JERUSALEM, AFP.- Promé minister israelí Benjamin Netanyahu a afirmá ku e bishita na Israel di e sekretario di estado merikano Marco Rubio ta evidensia di e relashonnan fuerte entre e dos aliadonan, dianan despues di ku un atake kontra Hamas i Qatar a kousa indignashon internashonal.
E biahe di Rubio a sosodé apesar ku presidente Donald Trump a mustra rabia pa e bombardeo israelí di djamars pasá kontra lidernan di e movementu islamita palestino na Qatar, aliado di Washington.
E atake sin presedente tabatin komo ophetivo e dirigentenan di Hamas reuní den un kompleho residensial den pleno sentro di Doha, kapital di e estado aki, mediadó di e negosiashonnan pa un paro den e guera na e Franja di Gaza.
E bombardeo “lo no kambia e naturalesa di nos relashon ku Israel pero nos mester papia di dje, e impakto ku e lo tin”, asina e hefe di diplomasia merikano a bisa na periodistanan na momentu ku e tabata bayendo.
Segun e departamento di estado, e ophetivo di e biahe di Rubio tabata pa garantisá ku Israel lo apoyá Merka, den e próksimo rekonosementu di un estado palestino pa parti di vários pais den e Asamblea Netanyahu a papia di Rubio komo esaki ta un amigu ekstraordinario di Israel, i a afirmá ku su bishita ta mustra e forsa di aliansa israelí merikano.
