E pareha Charlie i Erika Kirk, ku e bida Erika anunsiando di ta bai para na kabes dje organisashon Turning Point di su kasá kende a keda asesiná.
LOS ANGELES (AFP).- E biuda dje aktivista di derecha asesiná Charlie Kirk lo okupá su lugá na kabes dje grupo polítiko hubenil Turning Point USA, segun e direktiva a anunsiá. Dos dia despues ku su kasá a keda asesiná den un campus universitario, Erika Kirk a bisa na su siguidónan: “E movementu ku mi kasá a konstruí lo no muri” Awor, e direktiva di e organisashon a bisa ku Erika Kirk lo okupá e lugá di su kasá komo lider.
“E direktiva di Turning Point a eligí Erika Kirk di forma unánime komo direktor ehekutivo nobo i presidente dje direktiva”, segun a publiká ayera riba X. “Den kombersashonnan anterior, Charlie a ekspresá na vários ehekutivo ku esaki ta loke e ke den kaso ku e muri”. Charlie Kirk su morto a provoká un duelo profundo entre konservadornan lamentando morto di un hòmber ku nan a aklamá komo defensor di libertat di ekspreshon i balornan kristian.
E morto di Kirk a trese na kla e divishonnan den sosiedat norteamerikano. A keda informá ku tin hende a keda retirá for di nan trabou despues di a publiká riba retnan sosial mensahenan selebrando e morto di Kirk òf hasiendo chèrchi. Djárason último, e presentadó na televishon Jimmy Kimmel a bira e siguiente víktima ora ku e kompania di televishon ABC a anunsiá suspenshon di su programa “Jimmy Kimmel Live”. E desishon ei a keda tumá despues ku gobièrnu norteamerikano a menasá ku akshonnan legal despues di komentarionan dje presentadó riba reperkushonnan polítiko pa motibu dje asesinato di Kirk.
