WILLEMSTAD.- Siguiendo ku investigashon di e video ku ta sirkulá riba medio sosial tokante Cg 100 falsu, Centrale Bank van Curaçao en Sint Maarten (CBCS) a logra eksaminá un biyete di Cg 100 ku un variashon chikí den koló, similar na esun ku ta mustrá den e video.
CBCS por konfirmá ku e biyete ku nan a risibí ta outéntiko, apesar di e variashon chikí den koló.
Komo un guia general, públiko por tin konfiansa den e outentisidat di un biyete ora e di strepi 3D ta mustra moveshon i e otro karakterístikanan di seguridat ta presente i ta funshoná manera mester.
Verifiká e karakterístikanan di seguridat di e biyetenan di florin karibense riba e wèpsait caribbean-guilder.com òf den e èp My Caribbean Guilder, disponibel tantu pa Android komo pa iOS.
CBCS ta gradisí e komunidat pa su vigilansia i nan ta bisa di ta sigui enkurashá tur persona ku topa ku un biyete ku karakterístika inusual pa tuma kontakto ku CBCS na Kòrsou na (599 9) 434 5510 òf na Sint Maarten na (721) 542-3520.
