MERKA.- E famia kompletu Kardashian por kuminsa prepara nan mes pa un interesante kaso den korte na Merka.
Blac Chyna a entrega keho no solamente kontra di su eks, Rob Kardashian, pero tambe kontra e seis otro miembronan di e famia Jenner i Kardashian, asina New York Daily News a informa ayera.
Aparte di Rob Kardashian, Blac Chyna a entrega keho kontra di Kris, Kendal i Kylie Jenner i Kim, Khloe i Kourtney Kardashian.
E motibu di e kaso ta relashona ku e hecho ku a pospone e serie di realidat ‘Rob & Chyna’, kaminda aña pasa por a sigui e pareha den e lunanan previo nasementu di nan yu muhe, Dream.
Segun Chyna, e famia ta kulpabel na boikotea e di dos serie, loke ta pone perde hopi entrada. Chyna ta pretende ku famia Kardashian a hasi tur posibel pa e grabashon dje serie no por tuma luga. ‘Nan a hasi uso di tur nan poder i influensia pa no laga e grabashon tuma luga’, asina e abogado dje model a informa.
Segun un fuente, e historia ta kompletamente otro. For di e prome serie e pareha a kibra ku otro, loke a hasi praktikamente imposibel e grabashon. Nan ta alega tambe ku Chyna mes no kier tabata den mesun kamber ku Rob Kardashian.
