Situashon fèrfelu ayera na Spaña ku un ‘black-out’ rònt e pais. Riba e potrèt por mira hendenan pafó dje stashon di trein na Barcelona wardando pa sa kiko ta bai pasa.
MADRID, Spaña (AFP).- E presidente di gobièrnu spañó, Pedro Sanchez, te ku ayera nochi a duna di konosé di no tabatin informashon konkreto riba kousanan di un ‘black-out’ na Spaña for di den oranan di mèrdia.
“Ta mihó pa no spekulá, warda i nos lo sa e motibunan, no ta deskartá ningun hipótesis, pero awor akí nos mester enfoká riba e loke ta mas importante i esei ta pa por haña koriente bèk den nos kasnan”, segun e mandatario.
E servisionan di emergensia den Madrid so a realisá 286 operashon di reskate pa liberá hendenan atrapá den leftnan.
“Loke ku nos ta atendé awor akí ku mas frekuensia ta e kasonan di hendenan pegá den leftnan”, segun e hefe dje gobièrnu regional di Madrid, Isabel Diaz Ayudo.
E sistema amplio di metro dje kapital spañó, ku ta move den kareda di dos mion persona pa dia, a keda evakuá sin insidente.
Spaña i Portugal tin un ret di koriente altamente integrá ku ta operá komo un isla energétiko i ta vinkulá ku sobrá di Europa via di un kantidat chikitu di interkonekshon ku ta krusa frontera ku Fransia.
