WILLEMSTAD.- For di ayera mainta, algu promé ku 10 or a surgi interupshon den e sistema di koriente na Aqualectra ku a laga Kòrsou den skuridat total. A resultá ku tabata un korto sirkuito na CRU a kousa e problema serka Aqualectra, ku na su turno no por a entregá e koriente nesesario na komunidat.
Esaki tabata un sla formal pa Kòrsou. For di mainta ya diferente empresa a disidí di sera mirando ku e pronóstiko di Aqualectra tabata ku koriente lo a keda restablesé sigur 6 ora despues. Negoshinan a bira ketu, kayanan tabata ketu ketu i tur hende a kue kaminda di kas pa mira kiko nan or skapa ainda den eiskast.
Te ku awe mardugá promé ku EXTRA a bai imprenta ainda mayoria bario no tabatin koriente. I esnan ku tabata haña koriente mes esaki tabata bai bin. E koriente ta bin un ratu i despues ta bai pa bolbe bin un ratu.
Nos na EXTRA tambe a keda sin koriente i ta danki na nos amigunan (Sergio) di Venequip ku nos a haña un generator potente ku nos por a saka korant awe mainta.
Gobièrnu di su parti a anunsiá ku skolnan lo ta será awe, ya ku e situashon ta muchu mas serio ku hopi a kere. Finansieramente esaki tabata un sla duru pa Kòrsou kompleto. No ta sigur ku awe mainta e negoshinan ku a sera nan porta ayera mainta lo por habri bèk.
Ta di spera ku awe den kurso di dia lo por logra restablesé koriente pa Kòrsou kompleto. Di parti di Refineria di Kòrsou i CRU nan a anunsiá ku lo kuminda un investigashon pa determiná dikon e korto sirkuito i pa evitá ku den futuro algu asina aki lo ripití. Tin algun ekspreshon remarkabel den pasado ku ta interesante pa tene kuenta kuné den e investigashon.
