Dayenne Reed; Dosente i mama
Hopi bia nos ta konsiderá e yùfrou di skol, e di dos mama di nos yunan. Nos yunan ta pasa hopi ora serka nan, nan ta eduká i den hopi kaso asta e mucha ta mas ora serka e yùfrou/dosente ku e ta serka su mama mes. Dayenne Reed ta un dosente i mama ku nos a skohe pa papia kuné pa asina sigui den e selebrashon di luna di mama. Dayenne ta mama na kas i mama di mas di 30 mucha na skol. Dayene ta dosente di spañó na Mil i St. Josef. E ta mentor tambe. El a studia i kuminsá su karera komo edukadó na Hulanda i awor e tin 16 aña na Kòrsou den enseñansa.
Su eksperensia; Promé ku nos a bai den detaye di Dayenne komo mama di dos yu, el a konta Djasabra su eksperensia i kiko e ta pensa di e muchanan ku e ta haña su dilanti diariamente na skol. Tin diferente sorto di mucha, diferente ‘background’ i kada situashon ta diferente. E tin tur sorto di mucha i tur sorto di mayor i e desafio ta grandi, segun Dayene.
Ki momentu bo a sinti bu mama: Dayenne a konta ku un sonrisa di orguyoso riba su kara ku e momentu ku el a sintié realmente mama ta ora nan a hisa e promé yu di dje ku el a kaba di duna lus na dje i poné riba su barika. E momentu ei ta e momentu ku el a bisa ku awor si e ta di bèrdat bèrdat e ta mama. E tabata prepará. E yu a nase algu despues ku e mester a nase i e ku su kasá tabata plania ku nan ke yu. I esaki den tur sentido di palabra. I ku kla Dayenne a bisa nos ku bo no mester di un manual pa sa kon bo mester ta mama, kon bo tin di komportá komo mama i kon lanta si yunan. E tabatin ehèmpel di su mama i di su famia, ke men e tabata sa kon e tin di lanta su yunan.
Bo ta haña ku e ehèmpel ku bo a haña di bo mama tabata esun adekuá pa bo sigui kuné òf tabatin kosnan ku bo kier a hasi otro: El a bisa ku ora e tabata mucha el a pensa ku ora e bira mama, e lo hasié diferente pero ora bo ta mama bo ta bai riba loke bo mama a siña bu i bo ta purb’é asina. I tin sierto kos segun Dayenne ku na kaminda bo ta hinka bo drei pasobra nos kada un ta diferente. E ta konsiente ku e temporada ku el a lanta kosnan tabata diferente ku ora e ta lantando su yunan i naturalmente tin kosnan ku bo ta hasi otro.
Kua tabata e kambio ku tempu Dayene tabata mucha i ku awor e ta mama e ta eksperensiá; E kambio di mas grandi pa Dayenne ta nota serka su yunan i e yunan ku Dios a regal’é na skol ta media sosial/social media. E kòmpiuter, e Internet ta e kambio di mas grandi i si bo no paga tinu bo ta pèrdè bo yu den e telefòn ei. Si bo no tin sufisiente tempu komo mama, e media sosial ei ta esun ku ta eduká bo yu pa bo. E ta esun ku ta form’é, e yu ta haña e ehèmpel di e hendenan famoso i ta tuma e ehèmpelnan ei over.
Kiko hasi pa e media sosial ei tòg no ta esun ku ta eduká nos yunan; Segun Dayenne, nos tin di keda den komunikashon ku nos yunan. Antes bo ta pone un mucha dilanti televishon pa bo hasi algu pero awendia e mucha ta disponé mas fásil i tablet i telefòn i si nan ta dilanti di esakinan tur momento, bo no sa kiko e mucha ta hasi, abo komo mama no tin kontròl riba nan. Komo mayor bo tin di purba di ta konsiente kiko e yu ta hasiendo riba e telefòn i tablet ku ta dun’é pasobra si no tin kontròl bo no sa kiko e ta besig kuné i mas profundo e ta bai den loke ta ménos bon i bo ta pèrdè gara.
Bo a imaginá bo mes ku ta asina aki ser mama ta; Dayenne a kontestá ku NO. El a pensa kos leuk di hasi ku e yu, kiko ta hasi kuné te ora nan krese pero tin kosnan e no a imaginá su mes. El a eduká un edukashon di su yunan ku e ta haña importante. El a sòru pa e yunan tin nan mes opinion i ekspresá nan mes. Su yunan mag di no ta di akuerdo kuné, pero tòg tin bia e tabata pensa ku si kisas el a bai un tiki muchu leu pa laga e yunan ekspresá nan mes i tin nan mes opinion. Bo ta purba bo mes si ta boka grandi nan ta pone pero bo ke pa e mucha sali pa su mes eifó pero e mucha ta hasié ku abo komo mama mes tambe. I esei ta un di e kosnan ku komo mayor/mama bo mester ta konsiente di dje.
Tabatin kos ku bo a hasi ku lo bo a preferá di hasi otro: Riba e punto aki Dayenne a kontestá nos ku su yunan sa delantá ku ora e kos no ta na su agrado e promé kos ku ta kita for di nan, ta nan telefòn. I dado momentu e muchanan mes ta bis’é ku e kos ei no tin sentido. E ta puntra su mes si kisas e tabatin mas opshon di medida pa e tuma si algu no funshoná. E ta funshoná pe pero pa nan ta ménos leuk. Si e mucha no tin e telefòn un ratu kisas e ta bai sinta pensa i analisá kiko el a hasi robes i kiko pa hasi otro bia pa no pèrdè telefòn.
Siendo dosente di skol avansá ku ta mas largu ku e enseñansa di fundeshi, tabata nos pregunta si Dayene tabatin tòg sufisiente tempu pa su yunan; El a bisa ku e pregunta ei ta masha importante i manera nan ta bisa “it takes a village to raise a family”, danki Dios e tin su famia ku e por kai bèk riba dje pasobra komo dosente e ta bin korto na tempu pa su mes yunan debí na e kantidat di tempu ku bo ta besig ku kos di skol. Sea ta reunion, kombersashon ku mayor, ta konstantemente e ta besig. Si bo ke logra finansieramente tambe tin bia bo tin di hasi algu èkstra komo dosente aparte di tur e trabou ku e tin komo dosente mes. Hopi bia hende ta wak e kantidat di dia di fakansi ku nan tin komo dosente pero e dianan ei ta e momentu pa por rekargá, kue forsa pa sigui pasobra ta hopi or ta besig. I e dosente no ta besig solamente den e oranan na skol pero tambe e ta keda besig despues di e orario na skol atendiendo kosnan di skol. Tin kolega di skol di fundeshi ta bis’é ku nan no ta bai kas ku trabou i e ke sa kon nan ta hasi e kos ei pasobra e no por kontrolá durante di lès. Tin bia e ta sinti ku yunan ta sufri bou di esaki i pa kolmo su kasá tambe ta dosente ke men nan tur dos ta den enseñansa.
Kisas ta e sufisiente tempu falta serka mama/mayornan pa eduká nan yu for di kas i p’esei ta haña e muchanan ku awendia ta haña na skol: Dayenne a konta nos ku mare e tabatin 15 mucha pero e tin mínimo 25 te asta 30 mucha. Kada un ku su karakter i problemanan. I ora haña un komportashon for di òrdu kisas por bisa ta e mayor ta eduká e mucha asina pero si tene kuenta ku mayornan tin di traha dòbel warda, kasnan ku mama so ta kria yu i trahando dos trabou pa logra, tin bia ta wela, tanta tio ta wak e yu i por komprondé ku tin kaminda kos ta bai robes. Mester di mas tempu pa papia ku e yunan, pasa riba e reglanan, norma i balornan.
E regalo di mas bunita den bida; segun Dayenne algu u ta duna satisfakshon ta ora e topa alumnonan di hopi tempu pasá i ku a bai studia i ku ta buska kontakto òf ku el a topa afó òf ku ta bin bèk bin buska drechi di su dosente, ta duna satisfakshon. E ta sinti ku e tabatin un influensia riba e mucha ei i e kasonan ta hopi. I di su yunan mes, ora e hala atenshon di algu i bin rabiamentu i despues e brasa pa bis’é ku e tin rason ta duna satisfakshon ku e ta bon besig.
Presensia di tata ta importante den bida di un mucha: Dayenne ta haña esei masha masha importante mes. E ròl di e tata e mama nunka por tum’é. Den su kaso pa sierto kos e mucha ta bai serka su tata i otro serka dje. Bo ta rekonosé e alumno na skol ku no tin ròl di su tata pasobra e ta busk’é serka su dosente, serka su coach i e ròl di tata e mama ni maske e purba e no por yen’é. Tantu mama i tata tin nan ròl i niun ta mas importante ku otro.
Mi mes ta mama i mi mes ta tata: relashoná ku e frase ei Dayenne a bisa di por komprondé un hende ta bisa e mes ta mama i tata pero esei ta nifiká ku e mes ta hasi loke por pa ta tur dos pero e no ta nifiká ku bo por kumpli ku e ròl di tur dos. No ta pòrnada tin mama i tata i kada un tin nan ròl.
E reto di mas grandi; Pa Dayenne e reto di mas grandi komo mama, e ke pa ora e yunan mes ta adulto i nan mes a skohe pa nan mama i tata, nan ta orguyoso di mama i tata i nan ta mira den nos e ehèmpel pa sigui padilanti.
Tep pe mama; Pa e mama òf futuro mama, Dayenne a bisa ku meskos ku el a referí na kuminsamentu di e entrevista aki riba media sosial, ta pa no pèrdè kontakto ku bo yu, kombersá maske kon drùk e dia tabata. Wak kiko e yu ta besig kuné riba telefòn. Mi ta sinti na skol e mucha tin gana di kombersá, e ta sinti falta di esei i papia bendishon riba bo yu. Palabra tin poder i elogiá mas tantu ku bo por. Un palabra di bendishon.
