Flora Jacobus

Presidente Sokudi

Novèmber ta luna di buzon di Sokudi. I ta e luna ku ta pone énfasis riba e malu di diabétiko òf tambe malu di suku manera nos ta bisa den boka di pueblo. Den e kuadro aki Sokudi tin diferente aktividat planeá entre otro charlanan pero tambe kaminata. Flora Jacobus presidente di Sokudi a konta kiko nan ta hasi i a pone énfasis riba e hendenan ku nan mester pa yuda komo boluntario.

 

44 aña Sokudi

Sokudi, Sosiedat Kurasoleño di Diabétiko. El a keda lantá na 1974 dia 29 ougùstùs, nan tin 44 aña i otro aña ta selebrá 45 aña. El a keda fundá pa dòkter Hewit ku e tempu ei trahando na hospital a ripará ku tin hopi diabétiko i no tin un asosashon pa hende ku ta sufri di suku i asina a lanta e organisashon. Komo meta nan ta promové bienestar di e malesa. I tin sierto aktividat ta hasi manera kurso básiko ku ta pa tur hende, adulto i mucha por bai ku nan mayornan. Ta pone énfasis pa bin ku famia. Pasobra esun den kas ku suku ta bon pa su famia tambe sa di e malesa pa asina nan sa kon pa atendé ku e persona ku suku ei. Tin tambe kaminata kanando den naturalesa i tambe kana duru. Loke tambe tin ta e gruponan ku ta bin huntu pa haña informashon dor di profeshonalnan. Esei ta sosodé un biaha pa luna. Mas aleu tin marshe di salú. Na e marshe diferente empresa ta bai ku nan produktonan i ta duna informashon di dje.

Malesa di suku ta grandi

E malesa di suku ta grandi i e ta hasi nesesario pa tin un organisashon manera Sokudi. Flora a splika ku dia pa dia por ripará ku e malesa ta kresiendo. Segun senso di 2013 ta papia di mas òf ménos 9% ku ta hopi haltu. I awor den 2018 el a krese mas. I tin un pa dos hende ta kana rònt ku e malesa sin sa. Ta ora e malesa afektá nan ta bai dòkter i ta haña sa. E hende ta sa ku e tin suku si e tin di oriná hopi, e ta bebe hopi awa, e tin set i grawatamentu i infekshon na e parti delikado di e kurpa. For di ora mira e síntomanan ei bai dòkter di kas pa kontrolá e suku den sanger.

 

Tipo di diabétis

“Si bo ta tempran bo por aliviá hopi problema, pero mayoria biaha ora haña sa di e malesa ya e tin proseso kaba ta kanando kuné. Sigur e 5 aña promé bo tabatin sin sa i esei ya ta un problema kaba”, segun Flora. Tin diferente tipo di malesa di suku, tin e tipo un i tipo 2 i esun di embaraso. Tipo 1 ta serka mucha te 18 aña. Nan tambe ta dor di infekshon, hopi biaha nan sistema inmunológiko no ta funshoná bon i vírus ta mata e sèlnan den pánkreas i e pánkreas no ta funshoná mes. Serka nan nan mester pasa insulina den dia. Tin e tipo 2 ku ántes nan tabata yama ‘ouderdoms’ diabétis pero a resultá ku e ta bin dilanti awor serka mucha tambe. Esaki pasobra nos muchanan ta hiba un biba hopi no saludabel. Nan ta kome malu, kuminda di fastfood, trùk di pan, mayornan no tin tempu mas pa kushiná salú, ku berdura ets. I tur esaki ta influensiá e moda di kome aktualmente.

 

Malesa di suku ta hereditario

Si mi lanta tur dia kome bolo, tentalaria, panseiku, mi por haña suku? Esei ta e persepshon ku hopi biaha ta biba den komunidat esta ku si bo ta kome hopi kos ku suku, bo por bira diabétiko asina asina. Segun sra. Flora su splikashon, si e suku ta den famia mester wak e bon. Esaki e suku ta hereditario i ora sa ku den famia tin e, mester kontrolá.

Den komunidat tin informashon riba e malesa di suku. I tin basta informashon asta, pero ku e hendenan ta habri pa haña informashon ta un problema. Niun hende ke tende e palabra suku, diabétiko, kanser ni alzheimer. Pero bo mester bin pa haña informashon pa trat’é i kon pa sigui den bida kuné.

 

Dia mundial diabétis

Sokudi mes ta bai radio hopi pa papia di suku. Dia 14 di novèmber awor ta e dia mundial di diabétikonan. I riba e dia aki e tema ta famia i diabétiko i ta konsentrá hopi riba e famia. Bo ta haña ora un persona ta diabétiko, dòkternan no ta wak e famia. Pero ken ta atendé ku e famia ku tin di trata ku e pashènt ei. E pasonan ta; detekt’é, trat’é i kon pa sigui kuné, segun e splikashon di Flora. Esta mester atendé ku pashènt i famia huntu pa asina wak kon ta sigui atendé ku e malesa. I p’esei e konsentrashon e aña aki ta famia i diabétiko.

 

Proyektonan

I den e kuadro aki tambe dia 14 di novèmber na UoC di 6 pa 9 or di anochi lo ta un diálogo nashonal. Aki diferente e panelista lo duna nan pensamentu riba diabétis. I ta invitá tur hende pa bin dia 14 na UoC pa trese nan pensamentu i preokupashonnan lo keda kontestá.
Dia 17 di novèmber tambe tin charlanan na WTC. Esei ta di 9 pa 1 or di mèrdia i einan mester inskribí òf pasa na ofisina di Sokudi.
Dia 24 di novèmber tambe lo tin un kaminata ku lo sali di SVB, kana lora rònt koredor i bai SVB bèk. Pa esaki por kumpra T-shirt na Sokudi su ofisina.
I teniendo na kuenta ku ta nan luna di Buzon, lo bai topa voluntarionan di Sokudi na diferente punto, entre otro supermerkado ku nan buzonnan bèrdè kaminda nan ta kolektá fondo pa e organisashon. Ta ku e sènnan aki nan lo drei e organisashon ku tur su proyektonan ku nan tin.

 

Mester di boluntario

I pa e kantidat di trabou ku tin i pa e kantidat di proyektonan den tapara, Flora Jacobus ta keda ku mester tin muchu mas boluntario. Sokudi mester di hopi hende pa yuda. I komo boluntario no tin pago i esei hopi hende ta ferwaktu. Sokudi ta haña un tiki supsidio di gobièrnu i no ta sufisiente pa paga un boluntario. I den e akshonnan di prekmentu mester di boluntario pa hasi esaki.
I pa bira boluntario bo no mester ta pashènt di suku. Pa bira boluntario mester sigui kurso. Ta den e kursonan ta haña e konosementu kon pa duna splikashon ora hendenan ta rekerí esaki i tambe kon ta sostené e personanan di suku. I den e kurso ta haña un profeshonal ku ta duna lèsnan. Ta pa falta di boluntario mes tabatin algun aña ku Sokudi tabata basta ketu. Pero awor nan a bin bèk, nan ke duna Sokudi un kara nobo, segun sra. Flora a splika. I pa esei tin tambe un direktiva nobo.

 

Kuida bo kurpa

“Ora bo tende e malesa suku no ke men di bida a kaba. Ora haña e malesa di suku aki nos tin di kòrda ku Sokudi tei pa bo, si bo bini Sokudi i realisá ku mi tin e suku no kai den otro, nos tei pa yuda bu, nos ta duna bu informashon , kurso ku ora e nèrviosidat ei drenta nos ta kalma bu i ku suku bo por biba hopi largu. Djis tene kuenta loke bo ta kome. Limitá pan, funchi, aros kita man fo’i djus, produktonan ku suku i ban sigui biba ku informashon i edukashon, nos tei pa yuda bu”.

Sokudi su ofisina ta keda na Colebra Berde den e edifisio di Bob Carwash. Nan number di telefòn ta 888-8844 i por WhatsApp na 660-2772.

 

LAGA UN KOMENTARIO

Please enter your comment!
Please enter your name here