MERKA, AP.- Boeing no a kompartí informashon klave di e modèl 737 Max ku piloto i reguladornan. Atministrashon Federal di Aviashon di Merka no tabata kapasitá pa komprondé e sistema di buelo outomátiko involukrá den dos aksidente mortal di avion, segun revelashon di un pènel internashonal di regulador di aviashon.
E pènel a hasi 12 rekomendashon pa mehora e sertifikashon di FAA pa avionnan nobo, inkluyendo mas énfasis a komprondé kon e pilotonan lo manehá e kantidat kresiente di outomatisashon den avionnan moderno.
E rapòrt, deskribí komo un revishon tékniko di outoridat konhunto, a enfoká riba FAA su aprobashon di e sistema nobo di kontròl di buelo ku yama MCAS. E software a baha nanishi di e Max outomátikamente promé ku e avionnan a kai na Indonesia i Etiopia, lagando un total di 346 persona morto.
Buelonan di e modèl Max a keda suspendé for di mart. E revishon internashonal di sinku luna tabata independiente di FAA su konsiderashon pa sertifiká e avion òf keda sin hasi esaki, na momentu ku Boeing finalisá ku aktualisashonnan di e software i kòmpiuternan den e avion.
