‘Boka Sami bon representá den Karnaval 50’

... Germain ‘Sami’ Cristina ...

WILLEMSTAD.- Bario di Boka Sami ta sumamente kontentu i orguyoso ku den e selebrashon di 50 aña di Karnaval di Kòrsou ku tin un grupo di hóben dje bario ku ta forma parti di diferente aktividat karnavalesko.
Sra. Jacinta Constancia, bosero di Bario di Boka Sami a indiká esaki splikando ku e bario tin entre otro Neny Domacasse i Germain ‘Sami’ Cristina partisipando den Festival di Tumba.
Yùfrou, Judreanne Torbed ta partisipá den e elekshon di Reina i Rei Tiner, miéntras ku Syandra Cicilia ta partisipando den e elekshon di Reina di Karnaval.
Neny Domacasse i Sami Cristina no ta dos deskonosí den farándula. Neny ta un kantante ku a forma parti di Grupo Kompèr i awor ta na kabes dje grupo rítmiko ‘Den Chiki’. ‘Sami’ Cristina den pasado a forma parti di Q-Sign i na vários okashon a partisipá den Festival di Tumba.
Judreanne Torbed den pasado a keda korona komo Reina di Karnaval Hubenil i a partisipá na vários otro sertámen i a gana premio, awor e tei partisipá den elekshon di Rei i Reina Tiner.
Syandra Cicilia ku den pasado a partisipá ku éksito na vários aktividat e aña aki ta bai partisipá den Elekshon di Reina di Karnaval 2020.
Bario di Boka Sami tin kuater hóben ku talento ku un biaha mas tei saka kara di Bario di Boka.
E petishon di Sra. Constancia ta pa abitantenan di e bario i bisindario pa sostené e hubentut dje bario kompletu. Tin oportunidat pa kumpra karchi di e elekshonnan den bario mes i asina demostrá ku bo ta sostené e futuro generashon.
Pa mas informashon i kompra di karchi por yama 517-3294, 697-5791 òf 568-3793.
Bario di Boka Sami ban sostené nos hóbennan.

SHARE

LEAVE A REPLY