LA PAZ, AP.- E kansier nobo di Bolivia a anunsiá djabièrnè ku e pais a kibra e relashon diplomátiko ku e gobièrnu di Nicolás Maduro. Aparte di esaki e pais lo alehá di UNASUR i ALBA tambe i lo sali di e brigada médiko kubano. Esaki ta un giro di 180 grado relashoná ku polítika eksterior di Bolivia, karakterisá pa mas di 14 aña di gobièrnu di eks presidente Evo Morales.
Kanier Karen Longaric a bisa den un rueda di prensa ku Bolivia lo bandoná UNASUR dor ku e “bloke no ta eksistí ni e no ta sirbi”.
El a agregá ku e gobièrnu di Bolivia a alehá di ALBA tambe, kual Hugo Chavez a impulsá.
Longaric a antisipá ku posiblemente e embahador venezolano na Bolivia, Cris Gonzalez, lo wòrdu deklará komo persona non grata. E funshonario a stòp tur embahador di Bolivia dor ku nan tabata “operadornan polítiko” ku eksepshon di e embahador na Perú i representante na Santa Sede.
E presidente interino Jeanine Añez lo no nombra ningun embahador durante e próksimo tres lunanan di su gobièrnu, asina el a bisa.
Añez a antisipá ku su gobièrnu transitorio ta rekonosé e lider opositor venezolano Juan Guaidó komo mandatario legítimo di Venezuela i a pidié pa e manda un embahador pa representá e pais na Bolivia.
Longaric a bisa ku e gobièrnu Boliviano nobo a entrega un keho na México pa e “pronunsiamentunan hostil” ku eks presidente Morales ta hasi desde ku el a sali di Bolivia.
Anteriormente, Añez a atvertí ku si e eks mandatario regresá e pais e lo wòrdu demanda pa froude elektoral, miéntras e gobièrnu i partido di Morales ta purba restourá pas i selebrá elekshon, meimei di protesta fuerte pa Morales regresá.
Algun pòmp di gasolin no a haña suministro pa motibu ku manifestantenan a blòkia kareteranan serka di siudat El Alto, un bastion di Morales i punto importante di distribushon di kombustibel.
“Nos ophetivo ta pa logra renunsia di Añez pa nos presidente por bolbe bèk”. E meresé di ta riba su trono kaminda e tabata durante e último 13 añanan ku a pasa”.
