LA PAZ, BOLIVIA, AP.- E gobièrnu interino di Bolivia a sigurá ku eks presidente Evo Morales a gasta hopi plaka riba konstrukshon di kanchanan deportivo kompará ku obranan di salu públiko, den un intento pa komplasé su siguidónan.
E minister di Presidensia interino, Yerko Nuñez a bisa djárason den un rueda di prensa ku outoridat a realisá un revishon prinsipal riba e programa sosial di Morales i a determiná ku el a gasta 520 mion dòler pa 1.029 obra deportivo i solamente 115 mion dòler riba 239 obra di salú.
E krítikonan di Morales a atak’e pa su gastunan eksesivo den pasado.
E programa a inisiá na aña 2006 ku un fondo inisial proveé pa e presidente venezolano ku a muri, Hugo Chavez, aliado di Morales. E programa a invertí 38 mion dòler den konstrukshon di 121 sede pa sindikatonan na fabor di gobièrnu.
Miéntras e tabata na poder, Morales a wòrdu kuestioná pa tur gastu miéntras e pais tabata pasando den un époka di produktonan básiko sumamente karu. Pero no tabatin ningun informe finansiero i e denunsiánan a wòrdu ignorá, segun loke e analista polítiko Carlos Cordero por kòrda.
