LA PAZ, BOLIVIA, AP.- E gobièrnu transitorio i gruponan ku ta manifestando na fabor di eks presidente Evo Morales, kier negoshá despues di dos dia violento.
E esfuersonan pa deklará un tregua no a duna resultado te ainda. Mediadónan di Nashon Uní, Union Europeo i Iglesia katóliko kier yuda den e proseso. 23 persona a muri te ainda i mas di 700 a resultá heridá segun un informe di Defensor di Pueblo.
E presidente interino Jeanine Añez, no a logra para e konfrontashonnan riba kaya. Komishon Interamerikano di derechi Humano a señalá ku agentenan polisial ta usa forsa eksesivo kontra manifestantenan na Cochabamba.
E krísis a desaroyá un dia despues di elekshon riba 20 di òktober. Tabatin diferente protesta kontra Morales, kual ta akusá e presidente di usa práktikanan froudulento pa gana elekshon i goberná pa un di kuater mandato. E mandatario a renunsia i hui pa México kaminda el a hasi un petishon pa haña asilo. Kedando na México, Morales a pidi su basenan pa sigui protesta.
Morales a pèrdè sosten di polis despues ku OEA a verifiká ku tabatin iregularidat durante e konteo di voto presidensial na Bolivia.
