LA PAZ, AP,- E presidente interino di Bolivia a deklará e embahadornan di México i Spaña komo persona non grata. Nan a haña 72 ora pa bandoná e pais despues di un insidente kaminda un grupo di spañó a yega serka di e embahada mehikano na La Paz. “Bolivia no ta kolonia di niun hende pues mester respetá e gobièrnu konstitushonal i su demokrasia”, asina e mandatario a bisa.

Kuater funshonario di seguridat den embahada di Spaña na Bolivia a presentá na e residensia di e embahadora mehikano na Bolivia ku kara tapa i posiblemente arma. E sospechosonan a paresé na embahadora Maria Teresa Mercado su residensia, kaminda nuebe eks funshonario di eks mandatario Evo Morales a tuma asilo. E funshonarionan ta akusá ku delitonan komun, segun kansier Karen Longaric a denunsiá.

E kansier di Spaña i México a afirmá ku a trata di un “bishita di kortesia” di Mercado i ku nan no tabatin intenshon di liberá e refugiadonan boliviano.

Longaric a aklará ku e ekspulshon di e tres diplomátikonan no ta impliká un kiebro di relashon ku e paisnan i ku outoridat spañó a ofresé su diskulpa.

LAGA UN KOMENTARIO

Please enter your comment!
Please enter your name here