BOLIVIA, AFP.- Hustisia di Bolivia a anulá e òrdu di detenshon kontra eks mandatario iskierdista Evo Morales pa delitonan di terorismo, un siman despues ku a skohe Luis Arce komo presidente nobo, segun indikashon di hues Jorge Quino.
E òrdu di aresto kontra e eks mandatario bibando den eksilio na Argentina a keda anulá pa motibu ku a “infringí su derechinan, básikamente esun di defensa”, segun indikashon di Quino, presidente di tribunal di Departamento di Hustisia di La Paz na e kanal Unitel.
E fiskal General di Bolivia a akusá Morales riba 6 di yüli pa delitonan di terorismo i finansiamentu di esaki. Tambe el a pidi pa detené Morales komo medida preventivo.
Outoridat a dikta un òrdu di aresto kontra Morales den desèmber, despues ku el a renunsiá riba 10 di novèmber meimei di un konvulshon sosial i akusashonnan di froude elektoral.
E eks mandatario indígena i su partido, Movimiento al Socialismo (MAS) a rechasá tur akusashon.
E gobièrnu derechista transitorio di Jeanine Añez a akusá gobièrnu di Morales a lo largo di e kampaña di elekshon di 18 di òktober último, kaminda Arce a gana. Arce ta eks minister di Finansa di Morales. E gobièrnu di Bolivia a tuma kontakto ku Korte Penal Internashonal na Den Haag riba 4 di sèptèmber pa denunsia Morales su krímennan kontra humanidat.
