Bolsonaro ku krítika fuerte riba Lula i poder hudisial

Un parada dje kandidato presidensial Flavio Bolsonaro ayera, ku un blas grandi mustrando presidente merikano, Donald Trump, ta tene un pankarta ku e presidente brasilero, Luis Inacio Lula da Silva, bistí na paña komo prizonero.

SAO PAULO, Brasil (AFP).- Ayera e kandidato presidensial brasilero, Flavio Bolsonaro, a reuní míles di siguidó na Sao Paulo kaminda el a rematá kontra di poder hudisial ku a kondená su tata i tambe kontra di presidente Lula, su rival den elekshon di 4 di òktober benidero.
E kampaña a drenta su último simannan ku bochincha di skandal finansiero pa supuesto korupshon di un wes kende ta esun ku a manda e èks-mandatario, Jair Bolsonaro, prizòn. Un multitut bistí ku suèternan bèrdè i gel, kolónan di selekshon brasilero di futbòl, a kompañá Flavio Bolsonaro kende a probechá dje dia di fiesta nashonal di Brasil pa ataká e presidente Luis Inacio Lula da Silva i e sistema hudisial.
E enkuestanan ta mustra un pelea pareu entre e presidente Lula, di 80 aña, i e senador Flavio Bolsonaro, di 45. E yu mayor i heredero polítiko dje èks-presidente Bolsonaro (2019-2022) a surgi komo kandidato despues ku hustisia den 2025 a kondená su tata na 27 aña di prizòn pa intento di gòlpi di estado kontra di Lula.
“Lula ta e responsabel di e kaos moral den kua Brasil ta pasando”, segun e senador kandidato. Su siguidónan na mes momentu ta boga pa destitushon dje wes Alexandre de Moraes kende ta keda akusá pa revelashonnan di un mega skandal finansiero.
Den kareda di 28.500 persona a asistí na e manifestashon di ayera, segun un konteo di “Monitor di Debate Politiko” di Universidat di Sao Paulo. “Mi ta bai traha pa reskatá e kredibilidat di poder hudisial brasilero.. mi kandidatura ta un protesta”, segun e senador Bolsonaro.
E skandal ku a drenta e kampaña ta envolví Daniel Vorcaro, un bankero ku a kai será pa un froude masha grandi. Vorcaro a yega di manda mensahenan pa Moraes ku e aparente meta pa skapa di e investigashon pa kua el a keda detené, segun a sali na kla.
Den luna di mei e kandidatura di Flavio Bolsonario a keda sakudí pa e revelashon di un oudio den kua e ta pidi Vorcaro sèn pa finansiá un pelíkula riba bida di su tata.
Tantu Lula komo Flavio ta konta ku 41% di intenshon di voto den un eventual di dos buèlta, segun enkuesta divulgá ayera.

Presidente brasilero, Luiz Inacio Lula da Silva huntu ku su kasá, Rosangela da Silva, durante parada militar ayera relashoná ku selebrashon di Dia di Independensia di Brasil.