Un bista durante dje seshon di votashon pa kondená òf apsolvé e eks-presidente brasilero Jair Bolsonaro (2019-2022) di gòlpi di estado.
BRASILIA (AFP).- Korte Supremo brasilero ayera a alkansá un mayoria di tres voto pa kondená Jair Bolsonaro pa gòlpi di estado, loke ta laga e eks-presidente pará den porta di un kastigu di sigur 40 aña di prizòn. E lider ultraderechista, di 70 aña, ta akusá di a liderá un organisashon kriminal armá pa trata di kue poder despues di a pèrdè elekshonnan den 2022 kontra dje presidente Luiz Inacio Lula da Silva.
E hues Carmen Lucia ayera a vota pa un kondena, ku a pone e skor na 3-1 na fabor di kondena. “Bolsonaro ta kulpabel dje krímennan pa kua el a keda akusá”, segun e hues na momento di emití su voto.
Pa Korte Supremo por adoptá di forma ofisial e desishon, ainda falta voto dje di sinku i último hues dje kaso, Cristiano Zanin. Despues e huesnan lo vota pa e kastigu, ku por suma te ku 43 aña di prizòn.
E eks-mandatario, ku a goberná Brasil di 2019 pa 2022, ta akusá ku huntu ku otro shete eks-kolaborador, entre nan eks-ministernan i hefenan militar, di a konspirá pa realisá un gòlpi di estado. E plan aki ku lo a inkluí pa asesiná Lula, no a keda ehekutá pa motibu di falta apoyo di e hefenan militar.
Bolsonaro, kende ta den aresto na kas for di ougùstùs, no ta partisipá den e oudiensianan den tribunal pa motibu di problema di salú. E lider ultraderechista ayera na inisio dje sekshon tabata huntu ku su kuñá Eduardo Torres den e patio dilanti di su kas na Brasilia.
Amnistia?
“Brasil kasi a regresá na diktadura”, segun e hues Alexandre de Moraes na momento di ekspresá su voto. E hues aki mes tambe tabata blanko di un supuesto plan di asesinato. Moraes a vota pa un kondena, meskos ku e hues Flavio Dino, eks-minister di Lula. Dino ademas a atvertí ku e krímennan pa kua a husga Bolsonaro no ta bini na remarke pa amnistia, esei na momento ku e “bolsonarismo” ta pusha den direkshon di un pordon legislativo pa su lider den kaso ku e keda kondená.
Kontrario na su koleganan, e hues Luiz Fux a atvertí kontra di un “huisio polítiko” pa Bolsonaro i a skohe pa apsolvé debí na falta di prueba. “E voto aki lo no interferí den e resultado final, pero lo e intervení den historia”, segun e diputado bolsonarista Luiz Lima.
