BRASILIA, Brasil (AFP).- Korte Supremo di Brasil ayera a nenga un petishon dje eks-presidente Jair Bolsonaro, investigá pa un supuesto plan di gòlpi di estado, pa biaha otro siman pa e tuma poseshon di Donald Trump na Merka.

E wes Alexandre de Moraes, di Tribunal Supremo Federal, a splika den su veredikto ku ainda ta eksistí ”posibilidat di intento di hui” di parti dje eks-mandatario.

Den luna di febrüari aña pasá polis a prohibí e ultraderechista Bolsonaro pa sali for di e pais i a tuma su pasport, den kuadro di un investigashon pa supuestamente plania un gòlpi di estado pa impedí ku Luiz Inacio da Silva lo a asumí presidensia di yanüari di 2023.

Ministerio Públiko denter di poko mester tuma desishon si ta presentá akusashon kontra dje eks-presidente. Bolsonaro ta bisa di ta keda “persiguí” i a deklará su mes inosente.

“E asuntu di pasport ainda ta riba mesa. “Segun m’a komprondé, mi abogadonan loapela”, segun Bolsonaro a deklará ayera na e kanal di You Tube dje revista Oeste, i a konsiderá  ku “tin un speransa masha chikitu” ku nos lo haña e oké.

Mas aleu el a duna di konosé ku su kasá Michelle di tur manera lo hasi e biahe pa ta presente na e instalashon  di Trump. ”Mi ta kere ku presidente Trump lo no keda kontentu, inkluso pa e motibunan ku ami lo no ta presente”, el a agregá.

E wes ku a trata e petishon di Bolsonaro a atvertí ku e eks-presidente “a bin ta defendé huida for dje pais i asilo den eksterior”, di esnan kondena pa e aktividatnan di 8 di yanüari di 2023,na momentu ku sentenáres di fanátiko di Bolsonario a invadí i destrosá e sede dje podernan públiko den Brasil.

LAGA UN KOMENTARIO

Please enter your comment!
Please enter your name here