BAGDAD (AP).- Bòm den marshenan i otro atakenan na Irak ayera a mata 40 persona. Un funshonario di rango haltu di e servisionan di spionahe a insinuá ku algun bewaker lo a aseptá soborno pa permití ku e teroristanan ta burla di e medidanan di seguridat alrededor di e peregrinonan shiita.
E kantidat di atakenan a oumentá e temor di ku Irak ta den e violensia despues ku e último sòldánan di Merka a sali di e pais na kabamentu di aña pasá. Mas ku 275 persona a muri den atakenan den e último simannan, ku ta e periodo mas sangriento despues di e retiro merikano.
Seis siudat i poblashonnan tabata blanko di e atakenan di ayera. E pió a tuma lugá na Diwaniya, na sùit di Bagdad, ora un trùk ku eksplosivo skondí denter di berduranan a eksplotá den un marshe yen di hende. Outoridatnan a bisa ku 26 persona a muri i 75 a resultá heridá.
Un vigilante den un puesto di kòntròl di siudat Diwaniya no a kontrolá e trùk adekuadamente ku e argumento di ku e no por a resistí e holó stinki di berduranan i frutanan ku a daña. Despues, otro vigilante a permití ku e mesun vehíkulo a drenta e marshe en bes di a ordená pa el a wòrdu deskargá pafó, manera e reglanan di seguridat ta stipulá, asina e funshonario a agregá.
E atakenan di ayera a tuma lugá miéntras sentenar di míles di peregrino musulman di e komunidat shiita ta bai e siudat Karbala e siman aki pa seremonianan religioso ku mester kulminá djabièrnè. E peregrinashonnan shiita ta un blanko predilekto di e rebeldenan sunita vinkulá ku al-Qaida.
