HERUSALEM, INDEFINI, AFP.- Un hóben kanades-israelí a muri i 14 persona mas a keda heridá djárason despues ku bòmnan a eksplotá na dos parada di bùs na Herusalèm. E grupo militante palestino Hamas a aploudí e atakenan.
Ta realisando un búskeda di e sospechosonan ku a ataká un área frekuentá pa hudiunan ultra òrtodòks den parti oksidental di e siudat.
Polis israelí a deskribí e eksploshonnan komo “un atake terorista kombiná” i a bisa personanan deskonosí a pone eksplosivonan na dos parada di bùs.
E promé eksploshon a mata un adolesente i heridá 11 persona mas, i un segundo eksploshon a heridá tres persona na un parada den serkania, segun indikashon di e hospitalnan ku a akohé e víktimanan.
E ofisina di promé minister a identifiká e mucha hòmber asesiná komo Aryeh Schupak, di 15 aña, kende segun Canada tabata un di su siudadanonan.
E agensia di seguridat nashonal Shin Bet a bisa na AFP ku e eksploshonnan ta e promé susesonan den Herusalèm desde 2016 i a bisa ku e aña aki a frustra 34 atentado.