BEIRUT, LIBANON (AFP).- Israel a indiká di a ataká e kuartel general dje movementu islamita Hezbolá. Na e sitio dje atakenan, den Haret Hreik, a keda seis enorme krater di vários meter di profundidat, tonelada di sobrá di edifisionan i nubianan shinishi. Segun un fuente yegá na Hezbolá, seis egipsio di e bario a basha den otro.
“Mi tabata den kas… mi Dios, un eksploshon teribel i m’a kere ku e edifisio lo kai riba mi”, segun Abir Hammound, un maestro di skol di 40 aña ku ta biba den zùit di Beirut, kaminda Israel a bombardiá e kazèrne prinsipal di Hezbolá. Tabata 6 or di atardi ora ku eksploshonnan enorme a sakudí e kapital libanes. Den kuestion di algun sekònde, seis edifisio a basha den otro.
Husam El Jawad, un abogado di 45 aña kende ta biba na 2 km for dje lugá ku a keda bombardiá, a sinti kon porta i bentananan di su kas a sakudí. “Tabata komo si fuera un grupo di avion a bombardiá nos na mesun momento, mi tabatin e impreshon ku e tabata hopi serka, siendo en realidat nan tabata leu for di mi”, segun el a agregá.
Minütnan despues, na Tel Aviv, e bosero di ehérsito israelí Daniel Hagari a anunsiá ku a realisá un “atake di presishon” kontra e kazèrne prinsipal di Hezbolá, Segun televishon israelí, e meta tata e hefe dje poderoso midimentu iraní, Hasan Nasralá. Un fuente yegá na Hezbolá a afirmá ku Hasralá “ta bon”.
Netanyahu a sigurá ku lo e sigui ataká Hezbolá den Libanon, ignorando e yamada internashonal pa stòp ku e guera. Poko despues, su ofisina a informá ku e ta kòrta den su estadia na Merka pa regresá Israel.
Segun outoridat libanes, mas di 700 persona a muri for di despues ku Israel un siman pasá a kuminsá bombardiá den ost di Libanon i zùit dje kapital Beirut.
