BEIRUT, LIBANON.- Israel a anunsiá ayera di a bombardiá mas ku 1.300 propiedat di e movementu islamita Hezbolá den zùit i ost di Líbano, bombardeonan ku a laga 350 morto. E sifra ei ta inkluí 24 mucha.
Ehérsito israelí tambe a anunsiá un atake den Beirut ku, segun un fuente yegá na Hezbola, tabata dirigí kontra un komandante dje movementu pro iraní den zùit di e pais, Ali Karake, number tres dje grupo islamita. Sinembargo, segun Hezbola, e komandante ta “bon i na un sitio sekreto”.
E balansa di e bombardeonan di ayera den zùit i ost di Líbano tabata di 356 morto, inkluso 24 mucha, i mas di 1.240 herido, e dia mas mortífero den kasi un aña di enfrentamentu na frontera, segun e Ministerio di Salú libanes. Entre esnan ku a pèrdè nan bida ta figurá tambe 42 hende muhé.
Den un video, e promé minister israelí, Benjamin Netanyahu, a rekomendá libanesnan pa “alehá nan mes for di zonanan di peliger”, miéntras ku ehérsito ta kaba su “operashon” den zùit dje pais i den e área di Beca, parti ost.
Su kolega libanes, Najin Mikati, a denunsiá “un plan di destrukshon” kontra di su pais, i a hasi un yamada riba Nashonnan Uní i “paisnan ku influensia” pa atendé ku gobièrnu israelí relashoná ku e agreshon aki.
“Ta un katástrofe, un masakre”, segun Jamal Badran, dòkter dje hospital den Nabatiya un siudat, zùit di Líbano. “E bombardeonan no a stòp, nan a bombardiá nos na momento ku nos tabata trasladá e heridonan”, segun el a relatá.
