PALESTINA (AFP).- Un áwaseru di bombardeo israelí a laga mas ku 50 morto den Siudat di Gaza, den nort dje teritorio palestino. Segun e bosero di Defensa Sivil, Mahmud Basal, e atakenan durante di henter dia tabatin komo meta e siudat mas grandi dje teritorio palestino, alkansando skolnan, kasnan i inkluso grupo di hende riba kaya.
Un dje atakenan a mata diesun persona i a heridá vários mas den un kas den e bario di Shujaiya i otro tabatin komo meta un grupo di palestino, ku shete morto, den e kaya Al Maamal dje siudat.
Sinku persona tambe a muri den un bombardeo riba un skol den e distrito di AlDarraj. “No tin mas espasio den hospitalnan pa risibí heridonan”, segun Basal a duna di konosé.
E bombardeonan a tuma lugá na un momentu ku boseronan israelí i tambe dje movementu Hamas, ku ta goberná den Gaza, a reportá avansenan den e kòmbersashonnan pa yega na un stòp temporal dje guera.
E stòp temporal akí ta dependé di liberashon di e rehennan retené den e teritorio for di despues dje atake dje movementu islamita palestino kontra di Israel riba 7 di òktober di aña 2023, loke tabata motibu ku e guera a kuminsá.