KRALENDIJK–E kabes di buriku ku deskonosínan a kologá na un palu di siman pasá na Subí Blanku ta hopi komentá i kondená den komunidat boneriano.Ta deskribí esaki den hopi seno komo un akto horibel, baho i vil, kometé pa un burdugu. Polis ta investigando, pero te awor no por a haña evidensia di ken por a hasi esaki, segun bosero polisial Génesis Saragoza a reakshoná na BONERIANO. Manera ta konosí,tabata djabièrnè mainta ku Boneiru a manesé i tuma nota di e kabes di buriku na e palu. Hopi hende ku tabata biniendo di Rincon e mainta ei a mira e kabes di buriku. Segun bosero polisial, despues di e notifikashon ku polis a risibí, un patruya a bai na e sitio indiká pa investigá e situashon. Lamentablemente, na e momentu ei e agentenan polisial no a topa ku niun indikashon òf evidensia relevante ku por kondusí na mas akshon. No opstante esaki, a registrá e situashon den e sistema digital di polis. “A dokumentá e insidente di forma detayá i tur informashon ku porta relevante pa e kaso aki lo ser agregá na e archivo eksistente. Nos ta keda alerta pa kada informashon nobo i/òf pista ku por kondusí na e sospechoso. Polis ta sigui monitoriá e situashon i ta keda pendiente pa kualkier pista nobo ku por keda investigá. ”Polis ta probechá pa pidi kualkier persona ku por a mira algu, a tende algu òf tin informashon relevante pa e investigashon, pa tuma kontakto ku polis na 715-8000 òf via di e liña di tep anónimo 9310. Mientrastantu a kita e opheto makaber aki for di e palu. No ta konosí ken a kit’e.

LAGA UN KOMENTARIO

Please enter your comment!
Please enter your name here