World Athletics Relays

 WILLEMSTAD.- E team di relevo 4x400m maskulino di Hulanda, ku e.o. e yunan di Kòrsou Lie-marvin Bonevacia i Ramsey Angela, ayera a gana oro den World Athletics Relays ku a tuma lugá na Silesia, Polonia. Ta trata di e mesun team ku den luna di mart último a gana e título europeo riba e disiplina den kampionato ‘indoor’.

E kampionato a tuma lugá na Polonia sin presensia di e.o. Merka i Jamaica, konsiderá dos dje potensianan mundial pa loke ta trata karedanan di relevo. No opstante e pelea tabata duru komo ku Hulanda, huntu ku Inglatera, Cuba i tambe Spaña ta figurá komo paisnan ku ta bringa na e nivel di merikano- i jamaikinonan.

No opstante, e biaha’ki Hulanda a keda kòrtiku riba 4x100m miéntras ku nan damanan di 4×100 konsiderá komo gran faborito, a finalisá di tres puesto.

Pa loke ta trata e ekipo 4x400m, Bonevacia i Angela huntu ku Tony van Diepen i Jochem Dobber den un tempu di 3:03.45 a laga Hapon i Botswana na di dos i terser puesto, respektivamente. Dobber a start fuerte, pa despues Bonevacia komo di dos koredó kue delantero. Angela a mira Sur Afrika pas’é, pero e ta sprint e último meternan pa bolbe manda Hulanda dilanti. Finalmente Van Diepen hopi fuerte ta mantené e promé puesto, bon pa oro.

E team di 4x100m ku djasabra a gana su seri, pero den final ayera desafortunadamente a faya den pasamentu di palu entre di tres i di kuater koredó.

Ménos bon tabata e prestashon di e ekipo 4x100m. maskulino. Djasabra nan a gana nan seri pa drenta final. Ayera tur kos a indiká ku nan lo a bringa pa oro. Pero Hensley Paulina komo e di kuater koredó, no a logra pasa e palu pa Christopher Garia ku a para mira kon tur e otro paisnan a kore bai buska linia di finish. Churandy Martina no tabata den e kuarteto pa kore e final.

Pa loke ta trata 4x100m femenino, e team di Hulanda ku tabata e gran faborito a drenta na di tres lugá (44.10 sek) tras di Italia (43.79) i Polonia (44.10) ku pa sentésimo di sekònde a keda dilanti di Hulanda.

Otro atleta yu di Kòrsou Terrence Agard a kore den e final di 4x400m. miksto. Esaki ta kareda ku kada team ta kore ku 2 atleta femenino i 2 maskulino. Despues ku den semi final Hulanda a gana su seri, pa e final nan a kambia tur dos koredó femenino i tambe un maskulino. pero esaki a kosta nan e kareda i a finalisá na último puesto. Italia a gana riba e disiplina, siguí pa Brazil  Rep. Dominicana.

 

LAGA UN KOMENTARIO

Please enter your comment!
Please enter your name here