LONDON, REINO UNI, AFP.- E promé minister britániko, Boris Johnson, a kondena asesinato di e afroamerikano George Floyd pa un agente polisial kolo kla na Merka i a afirmá ku “no tin lugá pa rasismo den nos sosiedat” den un “mensahe” na presidente merikano Donald Trump.
“Mi mensahe na presidente Trump ta pa rasismo, violensia rasista, no haña un posishon den nos sosiedat i mi tin sigur ku esaki ta un opinion ku mundu kompleto ta kompartí”, asina Johnson a bisa den un rueda di prensa na London. El a kondena loke a sosodé na Merka konsiderando esaki komo un akto sin hustifikashon i hororoso.
Diferente persona, inkluyendo mayoria kubri ku un masker a reuní na Hyde Park na London pa eksigí hustisia pa morto di Floyd.
Un asosiashon antirasista a pidi e británikonan pa hinka rudia dilanti di nan kas pa manifestá, respetando e reglanan di distansiamentu sosial.
“Nos kier mustra solidaridat ku tur esnan indigná pa e forma kon George Floyd a pèrdè su bida”, segun indikashon di un komunikado publiká riba web di e Konseho Nashonal di Hefe di Polis.
Un sentenar di persona a manifestá dilanti embahada di Merka na London djadumingu. Tabatin binti persona ku a wòrdu detené.
