WILLEMSTAD.- E di tres edishon di Marcha Kultural Bándariba lo tuma lugá e aña aki ku tres dia di selebrashon, asina Shurendi Pieternella dje organisashon a indiká durante di un rueda di prensa ku a tuma lugá djamars último na Rancho de Herberg.
E aña aki a kombiná tur aktividat den un wikènt i ta kuminsá riba djabièrnè, 26 di òktober ku un ‘Dia di Bambu’ den Hòfi Sterke Yerke ku presentashon di Grupo Ruta, Grupo Brasa Brasa i Grupo Limania. Entrada pa e aktividat aki ta 5 florin.
Riba djasabra 27 di òktober ta tuma lugá e ‘Festival Bos di Kunuku’ i ‘Elekshon Rei i Reina Kultural Bándariba’. Un total di 11 partisipante tin pa ‘Festival Bos di Kunuku’, miéntras ku tin 3 kandidata pa Reina Kultural Bándariba 2018. Entrada pa e dia aki ta 10 florin pa persona.
Djadumingu 28 di òktober lo tuma lugá e loke ya a bira un tradishon ‘Marcha Kultural Bándariba’ ku ta kuminsá pa 2 or di mèrdia na altura di Botika Mampuritu i ta terminá na Hòfi Sterke Yerke kaminda lo sigui ku un ‘Eksploshon Kultural’ te ku 12 or di anochi ku aktuashon di entre otro Grupo Komper, Den Chiki, Rítmiko den Goso, Grupo Rítmiko Sablika, Vega ku la diva Gigi komo gueststar. Entrada den hòfi ta 5 florin pa persona.
Tres Baluarte
Pa e aña aki Direktiva di Marcha Kultural Bándariba a skohe tres baluarte di Pariba: sr. Francis Knepa, sra. Edith Martina i sra. Merelyn Mariana Rafaela.
Direktiva di Kultural Bándariba ta invitá pueblo di Kòrsou i spesialmente e abitantenan di barionan pariba di Kòrsou pa duna sosten na e eventonan kultural ku ta keda organisá.
