JERUZALEM, ISRAEL (AFP).- E bosero di ehérsito israelí, Daniel Hagari, ayera a duna di konosé ku no por eliminá e movementu islamita palestino Hamas, loke a provoká un reakshon dirèkt di parti di gobièrnu di Israel, ku a ripití ku nan lo destruí Hamas.
“Hamas ta un ideologia, nos no por eliminá un ideologia. Pa bisa ku nos lo sòru pa Hamas disparsé ta tiramentu di santu den wowo di hende” segun e kontra almirante Daniel Hagari na un radio emisora.
“Si nos no ofresé un alternativa, na final, nos lo tin Hamas na poder den Gaza”, segun el a agregá na un momentu ku gobièrnu israelí ta dividí riba e futuro di e ‘strook’ di Gaza una bes ku e guera yega na un fin.
Hopi lihé su komentarionan a keda kontradesí pa e ofisina di promé minister israelí Benjamin Netanyahu, kende su gabinete a deklará ku e ofensiva den Gaza lo no finalisá miéntras ku nan no derotá Hamas.
E gabinete polítiko i di seguridat enkabesá pa promé minister Netanyahu a definí komo un dje metanan dje guera e destrukshon di kapasidat militar i gubernamental di Hamas segun el a bisa den un komunikado.
“Forsa di defensa di Israel, por supuesto, ta komprometé su mes na esei”, el a agregá.
Ehérsito a emití otro komunikado den kua a suprayá ku Hagari a papia di “e destrukshon di Hamas komo ideologia i idea”. Su palabranan tabata “bon kla”, nan ta bisa. “Kualke otro deklarashon lo ta saká for di konteksto di loke el a bisa”, segun nan ta asentuá.
E ofensiva israelí ya a kousa morto di por lo ménos 37.396 palestino den Gaza. E gran mayoria ta sivilnan.
