BERLIN (AFP).- Presidente di Botswana a menasá Alemania ku un regalo di 20.000 olefante, rabiá pasobra e gobièrnu aleman a kritiká e yagmentu i eksportashon di “trofeonan” ku su pais ta praktiká. Segun e presidente, nan ta hasi esei pa regulá e kantidat di animal.
“Alemannan mester biba ku e animalnan en bes di duna nos instrukshon”, segun e dirigente di Botswana, Mokgweetsi Masisi, den deklarashon na e korant aleman Bild. “No ta un chansa”, el a agregá riba su oferta pa manda 20.000 olefante pa e pais den nort di Europa. “Nos ke hasi un regalo na Alemania”, Massi a bisa, i a agregá ku “no ta aseptá un rechaso”.
Botswana ta konta ku e poblashon di mas grandi di olefante na mundu, den kareda di 130.000, i kada bes nan habitat ta bira mas difísil, segun e presidente. E mandatario a referí na atakenan riba hende, riba pueblonan i kultivo.
E krítikanan dje ministerio aleman di Medio Ambiente, dirigí pa ekologistanan, ta relashoná ku e “kabesnan” komo obra di arte (trofeo) di e yagmentu. Yagdónan oksidental riku ta kumpra eseinan.
E ministerio a menshoná mas trempan e aña’ki ku ta pensa riba e posibilidat di limitá di forma estrikto e importashon dje trofeonan.
“Den Union Europeo nos ta hibando diskushon ku e meta pa amplia e eksigensia di pèrmit di importashon di tur tipo di trofeo ku tin di aber ku yagmentu riba animalnan protehá”, segun bosero dje ministerio. Komo ku Alemania ta un dje importadornan di mas grandi den Union Europeo dje trofeonan di yagmentu, e pais tin un responsabilidat partikular”, segun e bosero a duna di konosé.
Pa loke ta trata e “regalo” sugirí pa e presidente Masisi, e ministerio aleman di Medio Ambiente a bisa ku “Botswana no a tuma kontakto” ainda riba esei.
