WILLEMSTAD.- Otro luna e kantante/guitarista Melvyn Hoefnagel ta hasi 70 aña. Mesora e idea a bai brota pa pone un fiesta pensando riba e banda ‘The Vampires’, lantá den añanan 60 na Kòrsou i den kua Melvyn tambe a militá.
Den e añanan ku a sigui a tene diferente ‘Vampires revival’; e último tabata na 2002, ku ta ya 15 aña pasá. Esei tabata kada be ku otro miembro di banda i no mas den e konstelashon original. Esei tabata pasobra no ta tur di nan ta biba na Kòrsou òf nan no ta ni na bida mes mas. Pero Melvyn Hoefnagel i ko-fundador Rob Reijnaert si t’ei (ámbos riba potrèt di e tempu ayá), huntu ku un otro di e tempu aya ku ta Freddy Sadek.
Pa sobrá kasi tur e otro integrantenan ta músikonan mas hóben ku di un forma masha dediká i motivá ta pone nan skouru bou di e proyekto ‘Vampires Memories’, inkluso Rob su yu Robin riba guitara.
Ta hasiendo tur e trámitenan pa rebibá e músika di añanan 50, 60 i 70, loke ta nifiká banda di rock & roll, tambe balada, merengue, ‘smartlap’, etc. E gran evento lo tuma lugá djasabra dia 23 di desèmber awor di 8’or di anochi te 2’or di mardugá na Rust en Burgh di Asiento kaminda a tene mas di e Vampires revivals aki.
Karchi ya ta optenibel na Mensing’s Caminada, Bruna (Zuikertuintje) i miembronan di e banda. Un boka bisa otro!

LAGA UN KOMENTARIO

Please enter your comment!
Please enter your name here