WILLEMSTAD.- Ayera trai mèrdia, Eduard Braam, parlamentario i kandidato pa minister pa MFK, a realisá un bishita bastante largu serka gobernadó sra Lucille George-Wout. For di ayera a kore e rumor ku gobernadó a manda yama sr. Braam i tambe sr. Ramon Chong (PNP) riba nan kandidatura pa minister den gabinete Pisas. Ayera trai mèrdia ta sr. Braam so a presentá.
Na su salida for di gobernadó, na promé instante sr. Braam a bisa ku e no tin ningun komentario di su bishita na gobernadó. Pero el a kategorisá su bishita serka gobernadó komo unu “masha gezellig”.
Finalmente el a bisa ku e no por bisa loke el a papia ku gobernadó. Pero e kombersashon ku gobernadó tabata unu ameno i trankil. El a bisa ku niun hende a manda yam’é manera e rumornan tabata kore ayera, pero e mes a pidi gobernadó un sita. Braam a sigui bisa ku esaki no ta e tópiko. El a bisa ku e ta kere ku dado momentu ta kada ken su derecho pa pidi un afsprak ku gobernadó.
Segun sr. Braam, e prosedura di screening ta kanando bon na su pareser. Ademas no por bisa ku su bishita ta inusual, pasobra gobernadó ta habri pa papia ku ken ku ta ku pidié un sita. Komo parlamentario, Braam a bisa ku e por pidi gobernadó un sita. E no ke a bisa ta ku kua pèchi el a realisá e bishita serka gobernadó. Tampoko e no tin ningun preokupashon.
E tin impreshon ku ta bai di tres pa kuater siman di screening. E ta kere ku el a dura. E no tin indikashon ku screening lo dura hopi mas pasombra ta den un pais di krísis pero e proseso tin di kana bon si.
E reunion di ayera no tin kontinuashon. Si el a dura largu, ta pasobra e tabata ameno i “gezellig” sr. Braam a ripití ku un sonrisa.
Relashoná ku e pregunta ku pueblo ke sa ta dikon el a bai serka gobernadó, pueblo ke transparensia manera nan a indiká, sr. Braam a kontestá ku e no ta wòri loke hende bisa di dje. E diskushon ku tin eifó, e ta lag’e tei einan i e no tin nada di aber ku su bishita serka gobernadó.
“Esnan ku ke asesiná mi polítikamente ta plak e asuntu di screening na mi bishita”. Tambe el a indiká ku e ta kere ku mas parlamentario mester hasi bishita personal serka gobernadó. E no ta mira nada malu den su bishita serka gobernadó.
