Brantwer tin kontròl hopi severo
WILLEMSTAD.- Brantwer Korsou a bolbe tene un kontròl riba e trabounan den Hospital Nobo Otrobanda, pero no ta ayera so, el a bira algu normal i nesesario meskos ku den tur otro proyekto grandi brantwer Korsou ta tene kontròl severo pa asina garantisá ku ta kumpli ku seguridat manera mester ta. Na palabra komandante di brantwer ing. Elvin Regina den deklarashon na EXTRA.
Seguridat kontra kandela ta un aspekto ku brantwer Korsou ta keda kontrolá kontinuamente. Korsou ta kedando kla ku konstrukshon di su hospital despues di hopi tempu. Den e kuadro ei brantwer ta tene kontròl bastante regular, den kada fase di e konstrukshon. Segun Regina, seguridat kontra kandela no ta algu ku ta sosodé un bia so. Brantwer ta kontrolá tur loke ta seguridat kontra kandela pero e parti di instalashonnan manera e sistema di alarma di kandela i sprinkler si tin otro instansianan ku ta kontrolá e ekiponan ei. E otro instansianan ta kùr i sertifiká e ekiponan ei.
Riba e pregunta na e komandante kon a bai ku e kontròlnan ku a tuma lugá ayera, el a duna di konosé ku e kontròl a bai manera plania. Curaçao Medical Center ta kanando den bon direkshon. Segun e komandante, no ta tur kos ta kla pero importante ta ku tin un plan pa finalisá e trabounan. Por tin partinan ku no ta keda kla pa apertura pero eseinan no ta aspektonan di tal magnitut ku nan ta stroba apertura ni funshonamentu di e hospital.
Riba e pregunta di EXTRA kon e situashon ta kompará ku hospital St. Elisabeth, komandante Regina a bisa EXTRA ku danki Dios nunka nada no a pasa na e hospital bieu pasobra ei si e seguridat kontra kandela no ta bon. Hospital bieu no tin nada kompará ku esun nobo. Ta bin aserka ku brantwer ta hopi severo pa e konstrukshon nobo aki teniendo kuenta no ku awor aki so, pero tambe ta pensa ku e hospital nobo lo bai dura hopi aña manera esun bieu.
