Brasa Transishon: Un paso importante den bida

Nahlienne Rafael

Nahlienne Rafael ta un klarividente i empátiko (helderziend i heldervoelend). E tema ku nos a toka kuné ta Brasa Transishon, un manera nèchi i respetuoso pa bisa, e transishon di fin di un persona su bida. E kòmbersashon ku Nahlienne no tin nada di aber ku bruheria pero e ta duna guia spiritual na e famianan òf e persona mes ku ta den su fase final di bida.

E fase final di bida ta masha importante, tantu pa e persona mes komo pa e famia i ser kerí ku ta keda atras. Brasa Transishon ta duna un sierto klousura emoshonal pero hopi biaha nos ta kore for di esaki, pasó e ta trese nos na e realidat ku nos no ke mira. E ta un forma di superashon ku ta trese alivio spiritual i emoshonal. Nahlienne ta usa Universal White Time Healing, un téknika ku ta limpia e energia di e hende su transishon i su famia. Despues di un par di seshon, e hende lo sinti ku un peso a kita for di dje.

Un Diferensia Importante
Na bista grandi, hende por konfundí klarividensia ku brueria pero tin un diferensia esensial. Klarividensia ta basá riba energia i konekshon spiritual, miéntras ku brueria ta mas un seri di práktika ku por tin diferente orígen i intenshon. Tur kos ta energia: tin energia duru (peso, tenshon, blokeo) i tin energia sòft (fluído, liberashon, klaridat). Ora nos no prosesá trouma, esaki ta krea un energia na nos kurpa i por trese malesa. Nahlienne ta konta su propio eksperensia: “Mi mama no tabata di akuerdo ku mi a bai biba Sint Maarten. El a rabia asina tantu ku dòkter a bisa ku nan a detektá depreshon serka dje. Esaki a forma un energia den su pechu i eventualmente nan a deskubrí ku e tabata sufri di kanser na pechu.” Rabia akumulá ta krea malesa. Rudia ta relashoná ku ego. Tristesa i pèrdidá por keda den barika. Asina nos ta akumulá energia ku mester surpasá, si no su efekto ta sigui molestiá nos, Nahlienne a splika.

Un don natural
Nahlienne ta konta ku for di chikí e tabata mira i sinti kos ku otro hende no tabata kapta. Na prinsipio e tabata pensa ku esaki ta norma, pero mas grandi e bira el a bin realisá ku tabata un don spiritual. Na 2010, el a sinti ku e mester hasi algu ku su mannan, sin sa kon. Esaki a trese e den e mundu di ‘healing’. Nahlienne su poder ta ku e ta sinti energia. Tin bia e ta haña doló di kabes i despues realisá ku esaki tabata energia di un hende ku tabata serka di dje. E ta sigui konta ku ora su mama a keda diagnóstiko ku kanser, el a bisa ku esaki ta bai trese su empresa di ‘healing’ na e siguiente nivel. El a profundisá su abilidat dor di studia ‘Death Doula’. ‘Healing’ ta pa prepará nos, pa ora loke ta sperá nos yega, nos sa kiko nos mester hasi. Despues ku Nahlienne su mama a fayesé, el a tuma tempu pa prosesá i superá e trouma i awor e ta yuda otro hende den e proseso akí.

Pèrdidá i Konekshon Spiritual
Si bo a pèrdè un persona stimá, e relashon spiritual no ta kaba. Un hende ku fayesé por sigui konektá ku bo den diferente manera: bo por soña ku nan, bo por haña mensahe via señalnan manera kantika, pluma òf bo por sinti nan energia na sierto momento. Si bo soña ku bo mama ku tin sigur 8 aña ku el a fayesé, Nahlienne su promé pregunta ta: “Kiko bo ta sinti ora bo lanta for di e soño?” E por ta un manera ku e persona akí ta purba konektá ku bo. Komo ora nos ta soña, nos ta mitar den un otro mundu, unda e persona por manda mensahe.

Laga Bai
‘Healing’ ta algu personal. Un hende ku ta huma sigaria no por simplemente stòp pasó otro hende ta mustra e video ku huma no ta bon. Si bo no ta kla pa laga bai, bo lo sigui hasi mesun kos. Pèrdidá ta bisa ku bo mester sigui konektá ku e persona di un otro forma. Si bo energia ta den trankilidat, bo sa ku e persona ta na pas.

Aktividatnan i Proyekto di ‘Healing’
Nahlienne ta traha riba un proyekto interesante: ‘End of Life Counseling’, un proyekto pa persona den nan último fase. Adishonal, e ta organisá seshon spesial, manera: Vollemaand healing kantu di laman. Journaling, kon pa skibi un karta pa un ser kerí. I seshon individual di guia. Tambe Nahlienne tin un buki “Atalanta”, ku ta un mapa pa prepará abo i bo famia pa pèrdidá. E buki ta kubri:
Salubridat: Kiko bo ke? Unda bo ke pasa bo último fase?
Hurídiko: Tèstamènt, dokumento finansiero
Maneho di kas: Kódigo, yabi, asuntu di kas
Finansa: Debe di kas òf outo
Memoria: Skibi un karta, traha un video, òf laga un último mensahe
E buki Atalanta ta disponibel pa FL.55 i bo por kumpr’é via di +5999 6709352 òf na Onderlingehulp.

Biba den Balansa i Gratitut
Nahlienne su lastu palabranan ta ku nos tin e poder pa trese kambio den nos bida. Un paso importante ta kuida bo mes dor di kome salú, tin un mentalidat positivo, wak kiko bo ta apsorbé, loke bo ta lesa, mira, skucha i papia. I semper demostrá gratitut i awor ku bo tin e chèns, bisa e hende ku bo ta stim’é. No laga miedu detené bo. Si bo biba un bida den balansa, ora bo bai bo por bisa: “I Did It My Way!”