BRASIL, AFP.- Brasil a apliká ayera, riba un enfermera di São Paulo, e promé vakuna kontra COVID-19, den un pais ku ta konfrontando un di dos ola di e pandemia, despues di diskushonnan rondó di e uso di ‘inmunisantenan’ di emergensia, e chinu Coronavac i e britániko di AstraZeneca/Oxford.

E gobièrnu di Brasil a kalifiká sin embargo e vakunashon ei komo un wega di merkadeo di e gobernadó di São Paulo, Joao Doria, enfrentá pa presidente Jair Bolsonaro i a indiká ku e plan nashonal di inmunisashon lo kuminsá ofisialmente djárason.

Monica Calazans un muhé di 54 aña ku ta traha den un unidat di terapia intensivo a risibí su promé dósis di Coronavac, produsí pa e firma chines Sinovac den asosashon ku e instituto Butantan di São Paulo, e estado mas pobla, kaminda a registrá kasi un kuartu di e kasi 210 mil mortonan pa Coronavirus den un pais di 212 mion di habitante.

Mas di 100 persona a keda vakuna despues di Calazans den e hospital instituto Emilio Ribas, asina e gobièrnu di São Paulo a informá.

E minister di salu Eduardo Pazuello a afirmá ku kualke movementu pafó di e plannan di e ministerio, lo ta den desakuerdo ku lei pasobra e ta despresiá e igualdat entre e estadonan i entre tur e brasileronan. El a sigui bisa ku e 6 mion di Coronavac ku a pidi pa uso di emergensia lo keda distribuí for di awe djaluna entre e 27 estadonan brasilero.

LAGA UN KOMENTARIO

Please enter your comment!
Please enter your name here