Eks-presidente brasilero Jair Bolsonaro kende den próksimo dianan lo tende kiko e hurado di 5 hues ta opiná pa loke ta trata su futuro.
BRASILIA (AFP).- Korte Supremo di Brasil ayera a kuminsá ku e votashon pa e veredikto den e kaso di gòlpi di estado kontra di eks-presidente Jair Bolsonaro, un proseso históriko ku Donald Trump a purba na influensiá ku sanshonnan kontra dje pais. E lider di derecha i ultraderecha brasilero, di 70 aña, ta kore riesgo na risibí un kastigu di 40 aña akusá di a konspirá pa purba na stroba e instalashon dje iskierdista Inacio Lula da Silva despues ku esaki a gan’e den elekshon.
Den oudiensianan públiko i retransmití en bibu, sinku hues mester vota te ku djabièrnè pa disidí e futuro dje eks-mandatario i otro shete ko-akusado, entre na vários eks-minister i militarnan di alto mando. Un mayoria simpel di tres voto ta sufisiente. E promé na eksponé su voto, na fabor di un kondena, tabata e hues Alexandre de Moraes, opheto di sanshon di parti di Merka i blanko di un supuesto plan di asesinato di parti di golpistanan liderá pa Bolsonaro. Durante di sinku ora largu, e hues a referí na un “organisashon kriminal”, ku durante di lunanan a koordiná pa realisá delitonan. E magistrado a vota pa kondená e ocho ko-akusadonan i a inkluí un akusashon spesífiko pa Bolsonaro: esun di a liderá e organisashon. “Brasil kasi a regresá den diktadura”, Moraes a bisa.
“No tin duda ku e teksto di awe di Moraes a keda skirbí for di algun luna pasá, kisas añanan promé ku e kaso”, segun e senador Flavi Bolsonaro, yu dje eks-presidente, refiriendo na su tata komo “un defensor di órden i legalidat”.
“Bolsonaristanan” ta konsiderá komo un echo ku nan lider lo risibí un kondena, pero nan no ta sintá ku mannan krusá. Ku mayoria den Kongreso, e derecha ta maniobrá pa vota pa un amnistia pa nan lider, un petishon kargá pa desena di míles di siguidónan den manifestashonnan den vários siudat dje pais.
Konsultá pa AFP, e gobernador di Sao Paulo, Tarcisio de Freitas, konsiderá posibel susesor di Bolsonaro den elekshonnan di 2026, a sigurá ku “tin sufisiente voto” pa e amnistia.
Bolsonaro semper a mustra konfiansa ku ta logra kita su inhabilitashon polítiko i ku e por presentá su mes den elekshonnan di 2026. Mientras tantu, e presidente Lula (79) ya tin intenshon pa postulá su mes pa reelekshon.
