BRASILIA (AFP).- Brasil i Merka a reanudá e diálogo riba impuesto komersial imponé di parti di Washington, segun gobièrnu brasilero a informá, algun dia despues di un yamada telefóniko entre e presidentenan Luiz Inacio Lula da Silva i Donald Trump.
Den luna di yüli último Merka a apliká dos buèlta di tarifa riba vários produkto brasilero pa supuesto práktikanan komersial no korekto i otro infrakshonnan ku Brasilia ta nenga. E ministernan brasilero di Relashonnan Eksterior i Komersio, Mauro Vieira i Marcio Elias Rosa, respektivamente, a reuní di forma virtual ku e representante komersial norteamerikano, Jameison Greer, segun informashon for di Brasilia.
“Tin algu ku a tuma lugá: for di despues dje yamada telefóniko dje presidente Lula, nan t’ei bèk na mesa di negosiashon”, segun Rosa a bisa na periodistanan. E iskierdista Lula, ku na su 80 aña ta buska re-elekshon den luna di òktober, dia 21 i ougùstùs a papia durante mas ku un ora ku Trump den un tono “amistoso” i “kordial”, segun e gobièrnu brasilero.
Despues Lula a duna di konosé ku el a bisa Trump ku e impuestonan “ta basá riba mentira” i ku e republikano “a rekonosé” su argumentonan.
E dos partinan a akordá pa bolbe reuní “na nivel ministerial riba un fecha oportuno” , pero te ku ayera sin avansenan konkreto. Lula a akusá Merka di ta buska pa interferí den elekshon presidensial brasilero, den kua lo e enfrentá Flavio Bolsonaro, yu dje èks-mandatario di derecha Jair Bolsonar, aliado di Trump.
