RIO DE JANEIRO, AP.- Un siman promé ku e elekshon ku lo definí e rumbo di e ekonomia mas grandi den Latinoamérika, míles di persona a protestá djasabra den Brasil kontra Jair Bolsonaro. Bolsonaro ta e faborito ku por vense iskierdista Fernando Haddad, den e segundo buèlta.
Ku un kampaña marká ku un klima di desakuerdo i polarisashon desde regreso demokrátiko na 1985, simpatisadónan iskierdista a enkabesá aktonan “den defensa di demokrasia” kontra Bolsonaro, kende ta wòrdu akusá komo un “fasista” i pa representá un desafio na demokrasia.
“E esenario aki ta hopi atverso, pero mi ta kere ainda ku Haddad tin posibilidat pa gana”. Asina Felipe Felix a sigurá na The Associted Press. Felix ta un profesor universitario di 31 aña.
E bentaha di Bolsonaro ta parse praktikamente ireversibel. Segun un enkuesta publiká djaweps pa e konsultent privá Datafolha, ta parse ku Bolsonaro tin 50% di voto kontra 35% di Haddad.
Haddad a wòrdu designá pa eks presidente Luiz Inacio Lula da Silva.
Meskos ku Felix, kasi sinku mil persona, den su mayoria muhé, a reuní den e plasa Cinelandia, den sentro di Rio de Janeiro, pa protesta kontra e eks kapitan di ehérsito.