BRASILIA (AFP).- Brasil a manifestá “indignashon” pa e anunsionan di tarifanan norteamerikano di 50%, pero a duna di konosé di “ta kla” pa sigui ku e negosiashonnan, segun un karta dirigí na Washington.
Den e dokumento mandá djamars pa sekretario norteamerikano di komersio, Howard Lutnick, i e representante komersial Jamieson Greer, e gobièrnu brasilero a deklará ”di ta kla pa diálogo ku outoridatnan norteamerikano i negoshá un solushon mutuamente aseptabel riba aspektonan komersial dje agènda bilateral”.
Firmá pa e vise presidente i minister di Industria i Komèrsio, Geraldo Alckmin, i e kansiyer Mauro Vieira, e karta no ta menshon un investigashon ku a start ayera di parti di e atministrashon di Trump relashonal ku e pais suramerikano pa “práktikanan komersial inhustu”.
Pero despues di a reuní ayera ku representantenan di empresanan norteamerikano na Brasil, Alckmin a bisa ku e gobièrnu brasilero “no ta mira ningun problema” den e asuntu i a konvoká Washington pa “huntu resolvé e kuestion di tarifanan”.
Trump siman pasá a menasá Brasil, goberná pa e iskierdista Luiz Inácio Lula da
Silva, ku tarifanan adishonal di su parti, despues di a akusá e pais di “yagmentu” riba e èks-presidente Jair Bolsonaro, husgá den korte supremo dje pais pa intenshon di gòlpi di estado.
E krísis sorpresivo ku Merka a lanta e popularidat di Lula, kende a saka un mensahe di unidat nashonal kontra dje “komportashon” norteamerikano.
E aprobashon dje èks-sindikalista, ku ya a goberná Brasil entre 2003 i 2010, a subi ku tres punto pa 43% i e desaprobashon a baha di 57% pa 53% entre mei i yüli, segun un enkuesta dje firma Quaest.
