RIO DE JANEIRO (AFP).- Outoridatnan di Brasil ayera a imponé multa pa kasi 30 mion dollar (153 mion real) riba TikTok pa fayo den e manera ku nan ta atendé ku dato di mucha- i hóbennan, un sanshon ku nan ta bisa di ta manda “un mensahe” na tur otro wèpsait.
Brasil a tuma medidanan firme pa regulá e rètnan sosial i pa algun luna kaba a eksigí ku e usuarionan bou di 16 aña mester pone un ‘link’ entre nan wèpsait i esun di nan mayornan.
Agensia Nashonal di Protekshon di Datonan (ANPD) a bisa di a identifiká serka TikTok kon ta atendé ku datonan di usuarionan menor di edat “sin un base legal”. Segun e agensia, ta usa datonan pa ofresé publisidat.
“Nos ta spera ku e episodio di awe ta yuda pa otro wèpsaitnan por komprondé e mensahe i eventualmente tuma medidanan di korekshon”, segun a keda bisá den un konferensia di prensa.
Ademas dje multa di 153 mion real, e organisashon a ordená Bytedance Brasil, filial brasilero di TikTok, kreá na China, pa eliminá e datonan optené na un manera no regular”.
Lopes a bisa ku e tratamentu robes di e datonan di parti di TikTok a trese hóbennan den publisidat na un manera no apropiá, inkluso ora ku esakinan subi e plataforma sin un registrashon propio.
TikTok no ménos ku siman pasá a yega un akuerdo pa paga 400 mion dollar pa pone fin na un demanda di parti di Merka den kua ta akusá TikTok di ta rekompilá datonan personal di menornan di edat sin pèrmit di nan mayornan.
Na Brasil e presidente iskierdista Luiz Inácio Lula da Sva, ta para’riba ku e plataformanan digital no por ta riba lei.
Den 2024, X a keda blòkiá pa un periodo di 40 dia mediante desishon di korte, te ora ku eks-kompania dje multimionario Elton Musk a kumpli ku sierto òrdunan Hudisial.
