BRASILIA, Brasil (AFP).- Brasil a oumentá e edat mínimo pa un persona transgénero por risibí tratamentu di hormon, di 16 pa 18 aña, den un resolushon publiká ayera.
E tratamentu di hormon pa menornan por desaroyá identifikashon seksual pa e género ku kua nan ta identifiká nan mes ta un diskushon den varios pais. Na Brasil el a keda outorisá pa Konseho Federal di Medisina den 2019.
Pero e Konseho, un organismo outónomo, a kambia di opinion i kuminsando awor dirèkt “e terapia esaki ta prohibí promé ku 18 aña di edat.
Na Merka kasi mitar di estadonan a pasa leinan pa prohibí e tratamentu ku hormon na menornan transgénero. Korte supremo norteamerikano, di mayoria konservador, ta eksaminá si e leinan ta di akuerdo ku konstitushon i te ku awor ta mustra ku opinionnan ta dividí.
Esnan na fabor dje terapianan akí ta sostené ku e por aliviá e sufrimentu di menornan ku ta sinti nan mes inkómodo òf konfundí ku nan sekso.
Pero algun dje paisnan pionero pa outorisá e kambio di sekso den último añanan, awor ta topa ku testimonio di adultonan ku ta arepentí di e hasi e tratamentunan.
Na Brasil, kongreso ku di mayoria ta konservador ta trahando riba proyektonan di lei pa detené dòkternan pa hasi e tratamentunan aki serka menornan di edat.
Na Argentina, e gobièrnu ultraderechista di Javier Milei, den luna di febrüari a prohibí e tratamentu ku hormonnan i operashonnan di kambio di sekso serka menornan.
