CHAPADA DOS GUIMARAES, BRASIL, AP.- E promé santuario pa olefante den Latinoamérika lo permití e olefante Maia pa kana den un grandura di 1.100 hèktar den Mato Grosso huntu ku Guida, un otro olefante asiátiko ku a yega e siman aki. E dos olefantenan, i probablemente vários desena di olefante mas ku por yega den futuro, lo wòrdu atendé pa un veterinario i por disfrutá di e region. “Sosiedatnan di mundu kompleto a kuminsá tuma nota di e trouma ku e animalnan ta keda kuné di e koutiverio ku nan ta aden”, asina Scott Blais a ekspresá, un merikano ku ya a kolaborá ku un inisiativa similar den Tennessee na aña 1995 i ku a yuda rekoudá fondo pa e empresa aki. “Mester bini ku mas solushon. No ta sufisiente pa simplemente bisa ku e animalnan aki mester di un mihó bida”.
Pa Blais i su kasá, pa nan por a yega kaminda nan ta awe no tabata fásil. Despues di vários aña di planifikashon, nan a muda pa Brasil dos aña pasá. E pareha a skohe e nashon mas grandi i poblá den Latinoamérika pa vários motibu. Un di nan ta debí na e kantidat di tereno disponibel, e presensia di personanan ku ta pensa similar na e pareha i e urgensia pa haña un sitio pa vários olefante ku ta den Brasil, Argentina i Chile. Empleadonan di e santuario ta bisa ku tin mas di 50 olefante den kondishonnan similar na Sur Amérika, ku den último etapa di su bida mester di un kas pasó zoológikonan ta serando òf ta prohibí uso di e animalnan den sirko.
Tantu Maia i Guida tin mas di 40 aña i no por traha den un sirko.
