Promé minister israelí Benjamin Netanyahu
ABU DHABI, EMIRATO ÁRABE UNI, AFP.- E promé “buelo komersial direkto” entre Israel i Emirato Árabe uni a aterisá na aeropuerto di Abu Dhabi djaluna, prosedente di Tel Aviv, dos siman despues ku e dos paisnan a anunsiá ku lo normalisá relashon ku otro.
“Awe ta un dia históriko. Esaki tabata nos soño i nos a traha pa realis’é”, asina e promé minister israelí Benjamin Netanyahu a bisa.
E buelo tabatin un delegashon israelí i merikano na bordo i a wòrdu enkabesá pa Jared Kushner, e asesor di presidente Donald Trump. Pa añadí mas simbolismo na e biahe, e avion a pasa den espasio aéreo di Saudi Arabia, un pais kual Israel no tin relashon kuné.
“Ta promé biaha ku esaki ta sosodé i mi kier gradisí Saudi Arabia pa hasié posibel”, asina Kushner a bisa despues di aterisá na Abu Dhabi.
Emirato i Israel a anunsiá un akuerdo sorprendente pa normalisá relashon riba 13 di ougùstùs. Esaki a hasi Emirato e promé region den Golfo ku ta establesé relashon ku Israel i e terser den e mundu árabe despues di sera pas ku Egipto na 1979 i Hordania na 1994.
