Famia, amistatnan i pueblo di Kòrsou a respondé…
WILLEMSTAD. – Ayera, Sala 2 di el Tributo fo’i mèrdia te despues di respòns, a keda yen di hende ku sea tabata famia, amistat òf fanátiko ku a bin tuma despedida di Doña Mafalda Minguel.
Djis promé ku respòns un ñetu di Mafalda a tira un spich kargá emoshonalmente i a konta kon den famia tur kos ta drai rondó di nan wela stimá. Palabranan bunita a keda ekspresá na nòmber di tur e ñetunan. Arnell, den representashon dje yunan a konta kon nan a lanta den kas komo músiko i kon te ku último e tabata esun enkargá pa pasa buska mama pa bai toka.
Respòns tabata na enkargo di reverendo Pastor Curtis.
Despues di respòns, a sigui e homenahe musikal ku presentashon di Arnell i Orkesta kompañando kantantenan femenino manera Yumayra Grijt, Ana Iria Nivillac, Lady Sue i un ñetu di Mafalda, Calimara Salsbach ku a interpretá e bunita kansion “Te Busco”.
Pa sera e homenahe Carlos Salsbach a kanta un dje piesanan mas gustá di Mafalda ku ta “Daniel”.
Doña Mafalda Minguel lo keda kremá den seno familiar.
Riba potrètnan por mira algun momentu durante dje bishita di kondolensia i homenahe musikal.
