Presidente ruso Vladimir Putin ta saludá e presidente di Burkina Faso, kapitan Ibrahim Traore, durante di un bishita ku esaki a hasi na Saint Petersburg.
ABIYAN, Kosta di Marfil (AFP).- E régimen militar di Burkina Faso lo restablesé e kastigu di morto, ku a keda abolí den 2018. “Ta un proyekto di kódigo penal ku ta restablesé e kastigu di morto pa un seri di delito, entre nan traishon na patria, aktonan di terorismo i di spionahe”, segun servisio di informashon dje gobièrnu.
Segun Amnestia Internashonal, e último ehekushon registrá den e pais ta data di 1988. Kastigu di morto a keda abolí bou dje régimen sivil di Roch Marc Christian Kaboré, trinta aña despues.
E pais ta keda goberná pa e kapitan Ibrahim Traore, kende a yega na poder despues di un gòlpi militar den sèptèmber di 2022. For di e tempu ei, e pais a aserká su aliadonan nobo manera Iran i Rusia i ta hibando un polítika hostil kontra di oksidente.
E teksto mester keda aprobá pa Asamblea Legislativo di transishon. Tambe e lei lo sanshoná “promoshon i práktika homoseksual”, segun e gobièrnu. Den luna di sèptèmber último, e pais a aprobá pa promé biaha un lei ku ta dikta kastigu di te 5 aña di prizòn pa “outornan di práktika homoseksual”.
