WILLEMSTAD.- Nunka a tuma lugá un kòmbersashon ophetivo rondó di futuro di refineria versus e ideanan di Green Town, esta krea algu duradero na e sitio kaminda a traha e refineria mas ku 100 aña pasá. Entretantu e situashon rondó di e refineria a keda mesun kos. E ta será, pero no tin klaridat ku ta sigui ku e industria petrolero òf no ta sigui ku esaki mas.
Asina David Dick ta bisa den e podcast 3’or ku Gino. “Tin ku hasi un evaluashon kiko ta kumbiní Kòrsou mas”, Dick ta bisa. Na su opinion Kòrsou no por tin un refineria. E echo ku a traha un refineria na Kòrsou ta pasobra nos tin un bahia ku ta sufisientemente hundu i e kompania Shell a traha e refineria i despues PdVSA a hür e refineria.
“Kòrsou mes no tin petroli, nos no tin e sèn i Kòrsou no ta den merkado di negoshi di petroli. Ta papia di habri e refineria, pero e pregunta ta: habrié kon? Otronan tin ku disidí si nan ke habri un refineria na Kòrsou. Ta bin aserka ku e hende aki mester tin un benefisio ku nan ta saka for di e nogoshi.”
Kòrsou tin un refineria spesífiko ku ta interesante pa Venezuela, Dick ta bisa mas aleu. “Pero, si ta otro kompania ta bai manehá e refineria ta bai wak efisiensia di e operashon. Kuantu e ta kosta pa proseso e krudo.”
E ta indiká ku e refineria di Kòrsou ta kosta hopi pa prosesá e krudo miéntras ku den Sur Amérika i na Canada tin diferente refineria ku tambe por prosesá e krudo Venezolano. Segun Dick Venezuela mes no ta den un posishon finansiero pa manehá un refineria. E ta mustra kon na Trinidad tambe a keda pretendé ku mester habri nan refineria di nobo, te ku gobièrnu a hinka e refineria den man di sindikatonan, pero te awe no a logra habri esaki.
E problema mas grandi sinembargo ta ku na Kòrsou no por sinta i kòmbersá pa determiná konhuntamente den ki direkshon mester bai, Dick ta enfatisá. “Mi ta ta trese punto aki dilanti ku tur bon boluntat, pero e ta bira batimentu di e persona, e idea, i e mensahero. No ta buska un grupo pa wak di forma ophetivo i neutral e puntonan pro i kontra.”
Tambe na Kòrsou ta papia den hopi kaso a base di loke a tende di un otro (“van horen zeggen”), Dick ta finalisá bisando. “Mi ta tende un hende bisa un kos i mi ta ripitié, te ku e loke ta ripití ta kuminsá parse bèrdat.”
