LA GUAIRA, VENEZUELA, AFP.- venezolanonan desesperá tabata buska entre ruina pa reskatá nan famianan, despues ku dos temblor fuerte djárason a laga por lo ménos 188 morto.
Vários edifisio a keda destruí i vários a sali riba kaya pa keda safe, despues di e temblornan di magnitut 7,2 i 7,5 ku a sakudí parti nort di e pais ku ménos di un minüt di diferensia.
E parti mas afektá tabata La Guaira, serka di Caracas, kaminda e temblor a pone ku mester a sera e aeropuerto prinsipal di e pais.
Presidente Delcy Rodriguez, ku a yega na poder di forma interino despues ku Merka a kapturá Nicolas Maduro, a bishitá e region ayera kual el a deklará komo “zona di desaster”. AFP a konstatá vários sakeo den e área.
E hefe di Parlamento, Jorge Rodriguez, ruman di Delcy, a bisa ku 1520 persona ta heridá.
Entre e heridonan tin vários mucha ku a keda reskatá. Algun tin nan nòmber skibí riba un banchi na nan pòls i nan no sa nòmber ni fam di nan mayornan.
Mundu kompleto a ofresé pa manda ekiponan di reskate pa yuda outoridatnan lokal. Papa Leon XIV a informá ku a asigná yudansa di emergensia di mas ku 100.000 dòler.
E promé temblor a tuma lugá djárason atardi alrededor di kuater pasá di seis, segun Servisio Geológiko di Merka. Un otro mas di magnitut 7,5 a sigui despues di e promé, apénas 1 minüt despues.
Despues di e di dos temblor, kasi 130 réplika a keda reportá.
