TEHERAN, IRAN (AFP).- Iran for di ayera a kuminsá ku trabounan di búskeda den nortwèst dje pais pa haña e helikòpter den kua tabata biaha e presidente Ebrahim Raisi, ku a sufri un aksidente. E perspektiva pa haña ku bida e presidente, di 63 aña i eligí den 2021, a bira ménos segun e dia di ayera tabata avansá sin ku tabatin informashon di paradero dje helikòpter ku a disparsé den oranan trempan di atardi den e zona Dizmar.
“Nos ta spera ku Dios lo duna bèk na e nashon nos presidente i su kompañeronan”, segun e guia supremo di Iran, e ayatola Alí Jamenei, afirmando ku e pais “no mester preokupá” ya ku “lo no tin ningun perturbashon”.
“Nos ta sigui di serka e informashonnan riba un posibel aterisahe forsoso di un helikòpter ku tabata transportá e presidente i outoridatnan iraní”, segun un bosero diplomátiko na Washington.
Vários pais di Golfo (Arabia Saudita, Catar, Emiratos Árabes Uní i Kuwait) a duna nan apoyo na Teherán i a ofresé yudansa pa e búskeda, meskos Siria i Irak.
Turkia a manda 32 trahadó di reskate i seis vehíkulo pa tuma parti na e trabounan di reskate, i e movementu islamita palestino Hamas, a ekspresá su “solidaridat kompleto ku e Repúblika Islamita di Iran”.
Union Europeo a indiká di a aktivá “su servisio di kartografia di reakshon rápido CopernicusEMS” pa fasilitá e búskeda.
“E búskeda a keda stroba pa kondishonnan meteorológiko no faboral”, segun a keda indiká pa e minister di interior, Ahmed Vahidi.
E helikòpter, un Bell 212, a forma parti di un grupo di tres helikòpter ku tabata biaha ku e komitiva presidensial. Dos di nan a aterisá sin problema na Tabriz, pero e helikòpter den kua Raisi tabata, no a yega na e sitio.
