NEW YORK.- Un hòmber ku a hui for di un prizòn na Pennsylvania ketu bai ta fugitivo, no opstante un búskeda masivo ku tin den e parti aki di Merka, esei pa motibu ku e ta ser konsiderá komo peligroso. E búskeda ta kontinuando pa di seis dia kaba, i esaki a pone ku outoridatnan a disidí di tene skolnan lokal será i a pidi residentenan pa nan keda será den kas. Ta un siman kaba ku e brasilero Danielo Cavalcante di 34 aña a logra hui di un forma inkreibel, i awor un kantidat grandi di ofisial polisial a ser poné riba pia, huntu ku helikòpter, drone, kachónan spesial etc.
Habitantenan a ser pidí pa lòk nan outonan, lòk nan portanan di kas, i pa keda vigilá rondó di nan. Cavalcante a haña un sentensia di bida largu pa motibu ku el a hinka su partner mata dilanti su yunan.
