DERNA, LIBIA, AFP.- Un siman despues di e inundashonnan devastador ku a lastra e siudat di Derna na Libia lagando míles di morto, ainda trahadónan di reskate lokal, apoyá pa ekiponan ekstranhero ta buskando kurpa di personanan ku ainda ta disparsé.

E ekiponan di reskate bistí ku trahenan di protekshon i ku máskara ta kontinuá ku e tarea pisá di buska sobrebibientenan ku por ta atrapá mei mei di lodo i entre edifisionan destrosá, outonan ku a keda kibrá i bou di palunan ku a kai.

E agensianan di ONU a atvertí ku e abitantenan di Derna, un siudat di 100 mil habitante mester di awa di bebe, kuminda, refugio i suministronan básiko mei mei di e rísiko di kólera, diarea, deshidratashon i desnutrishon.

Mohammed Al Zawi di 25 aña a relatá pa AFP ku e anochi di e tragedia el a mira kon awa tabata lastra outo ku hende den dje, personanan ku awa a lastra bai kuné i ophetonan pushá pa e koriente.

Kuater trahadó di reskate a muri

I mientrastantu ayera kuater trahadó di reskate griego a muri den un aksidente di tráfiko na Libia, poko despues di nan yegada na e pais pa partisipá den e operashonnan di búskeda i reskate despues di e inundashonnan.

E aksidente a sosodé ora un ekipo griego, konsistí di 19 persona tabata bayendo Bengasi e siudat di Derna un di esnan mas afektá.

Kuater miembro di e ekipo a muri i otro 15 a resultá heridá, shete di nan ta grave, asina e minister di salubridat di Libia Othman Abdeljalil a bisa den un konferensia di prensa.

…Búskeda mei mei di loke a sobra di un edifisio ku a basha aden…

LAGA UN KOMENTARIO

Please enter your comment!
Please enter your name here