COLOMBIA (AP).- Kuerpo di reskate a sigui djadumingu ku búskeda di personanan ku ta pèrdí despues ku tres riu a basha afó na Colombia i a laga un kantidat di mas ku 210 morto, 203 herido i 200 persona pèrdí. Despues di un reunion di mas ku dos ora ku outoridatnan di e pais e Presidente Juan Manuel Santos a ofresé un konferensia di prensa i a duna ku e kantidat di personanan ku a fayesé a oumentá na mas ku 210. Di esnan ku a fayesé ya tin 170 ku a keda identifiká i 112 ku ta den beslag na e fiskalia pa keda entregá na nan famia. Entre esnan ku a fayesé tin 43 mucha chikí. E mandatario a bisa ku un avion di Forsa Armá di Colombia a bula riba e zona ku a keda afektá i no a haña niun indikashon di siere di niun riu òf dam. Esaki a bin dilanti pasó hopi hende a keda spanta pa e posibilidat di otro avalancha òf di otro situashon pero ke duna trankilidat. Ademas Santos a anunsiá ku e gastunan di e servisionan di entiero di e víktimanan ta kai bou di kargo di e Estado pero no a bisa ki dia ta kuminsá ku entiero. Tambe Santos a bisa ku e tres plantanan di koriente i e tres nan di awa ta keda solushoná un bes pa por kuminsá kumpli ku awa i elektrisidat pa e pueblo. Pa yuda e damnifikadonan di e desaster Banco Interamericano de Desarrollo a duna 200 mil dòler. Den e enkuentro ku prensa Santos a bisa ku na e momentunan aki tin 1.800 persona ta yudando e damnifikadonan manera sòldá, polis, helikòpter i avionnan. Alejandro Gaviria minister di salú a bisa ku a hiba algun pashènt na e siudat Neiva i Popayan. Miéntras e kantidat di morto ta sigui oumentá i famianan di vários di esnan ku ta pèrdí ta na zùit Colombia ta pèrdè speransa ku nan ta haña nan ser kerí na bida. Hòmber ku kolchon riba lomba i muhénan kargando sofa i adolesentenan ku bòternan di gas bashí ku a keda den nan kas. Hopi hende pará na hospital buskando famianan ku nota riba lista otronan ta buska den raisnan di palu pa wak si tin hende, edifisionan ku a keda ta wanta riba lodo. Trùknan ta bin ku kolchon i mesa i bomberonan ku kachó buskando kurpanan. Mas di 2000 damnifikado a keda drumí den lugánan ku nan a risibí temporalmente pasó nan kas a keda inundá i nan tin temor ku algu asina por bolbe presentá den oranan di anochi. Santos a yega djasabra anochi na e lugá di tragedia kaminda el a deklará estado di kalamidat i a anunsiá un kuenta di banko pa risibí donashon pa e damnifikadonan. Santos ta gradisí e yudansa i apoyo internashonalmente i Colombia a risibí solidaridat di Venezuela, Perú, Panama, Francia, Brazil, Ecuador i Bolivia. Papa Francisco a manda su kondolensia for di Vaticano. Di kada kurpa ku a haña a tuma vingerprint, DNA i radiografia i e nòmbernan ta poné riba lista ku ta kompartí ku famianan na kas mortuario.
